La mancanza da medicaments s’intensivescha. Entant sajan tut las sorts da medicaments stgarsas en Svizra. I saja nairas uras da reagir, ha ditg la presidenta da Pharmasuisse Martine Ruggli Ducrot en in’intervista cun la gasetta «Le Temps». Il problem saja la chadaina da furniziun.
Ils pajais dals quals la Svizra dependa tar tschertas substanzas, hajan pervi da la pandemia da corona e pervi dals custs da producziun pli auts, reducì u schizunt franà lur exports. Sajan quai medicaments cunter diabetes u pressiun dal sang auta, opioids u antibiotica – dapertut dettia memia pauc.
I dettia er in problem cun material d'emballadi sco per exempel buttiglias da vaider che vegnan producidas surtut en l'Ucraina, ha Ruggli-Ducrot ditg vinavant. Ella pretenda ina collavuraziun cun l'Uniun europeica.
Igl è indispensabel da diversifitgar la producziun continentala, per che l'Europa daventia pli independenta sch'i dat problems en las chadainas da furniziun.
Las substanzas activas necessarias vegnian savens producidas en l'Asia. I saja questa auta concentraziun che fetschia vegnir vulnerabel l'entir sistem.
Or da l'archiv:
