Tut en tut 23 persunas dal militar sustegnan dapi ier venderdi saira da tgirar pazients en dus ospitals tessinais. Quai ha annunzià il ministeri da defensiun.
Als ospitals pertutgads a Bellinzona e Lugano mettia l'armada a disposiziun material medicinal. Uschia per exempel maschinas da respiraziun e cun sistems da monitoring, barellas sco er tendas universalas e containers per la tgira.
Glindesdi vegn il battagliun d’ospital tschintg en acziun cun in servetsch extraordinari. Tut en tut ha l'armada tschintg battagliuns d'ospital. L'incumbensa principala dal battagliun d'ospital tschintg è da sustegnair ils ospitals civils cun persunal e material. Tranter auter po el surpigliar fin 200 pazients. Quant ditg che lur engaschament vegn a durar n'è anc betg enconuschent.
