En il context cun la guerra en l'Ucraina èsi da quintar cun dapli attatgas da cyber en Svizra. Spezialmain Genevra stettia en il focus da la spiunascha, pervi da las organisaziuns internaziunalas cun sedia là. Quai las conclusiuns dal Servetsch secret svizzer (NDB) en ses rapport. Tenor il schef dal NDB Christian Dussey sappian ins da plirs tozzels spiuns russ che sajan activs a Genevra.
L'avrigl saja la guerra da cyber escalada. E la Russia na saja betg il sulet stadi cun las capacitads ed abilitads d'exequir operaziuns da cyber. Attatgas sumegliantas vegnian a s'augmentar ils proxims onns.
Impedir ch'ulteriurs uffiziers russ vegnan
Genevra saja il punct central da talas activitads, tranter auter perquai ch'il basegn per discurs bilaterals e multilaterals sin terren neutral creschia en temp da guerra. Uschia quinta il NDB cun dapli spiunadi.
Auter che auters stadis europeics n'ha la Svizra betg expulsà e tramess a chasa uffiziers dal servetsch d'infurmaziun russ. Per ch'ils servetschs russ na tramettian ussa betg dapli persunas en la Svizra, dovria quai tut ils meds pussaivels per impedir ch'ulteriurs uffiziers dal servetsch d'infurmaziun russ vegnian en Svizra.
Smanatscha da terror resta augmentada
Tenor la valitaziun dal NDB resta la smanatscha da terror en Svizra augmentada. Relevant per questa situaziun na saja però betg la guerra en l'Ucraina, mabain vinavant il Stadi Islamic e la Al-Kaida. Il scenari il pli realistic na saja però betg in'attatga d'ina da talas organisaziuns, mabain dad in attentader singul che sa referescha sin talas organisaziuns terroristicas.
Las gruppas dischihadisticas en Svizra sajan actualmain fitg eterogenas e pauc organisadas, concluda il rapport dal NDB. A lunga vista pudessia quai però midar e daventar ina smanatscha. Definitiv ina smanatscha marcanta saja però la scena extrema. 81 acts da violenza en il 2021 attribuescha il NDB a la scena extrema da la sanestra e trais a la scena extrema da la dretga. En connex cun l'uschenumnà extremissem da corona ha il NDB quintà 19 acts da violenza.
