Per l'agid a victimas han ils chantuns paja da l'onn 2000 fin 2022 en tut ina summa da 181 milliuns francs. E 62% da las dumondas inoltradas èn vegnidas lubidas, communitgescha l'Uffizi federal da statistica.
La summa da las indemnisaziuns e satisfacziuns variescha dentant sur ils onns. Dapi il 2010 dettia plinavant in trend en direcziun engiu. 800 dumondas haja dà il 2000, enfin il 2011 saja il dumber da dumondas creschì, silsuenter è el dentant puspè ids enavos.
En 84% ha l'unfrenda sezza tschentà la dumonda. Las dumondas èn il pli savens vegnidas fatschas en connex cun acts da violenza, rapiments, mulestas sexualas, violaziuns e mazzaments. En 90% dals cas èn ils acts vegnids fatgs presumablamain d'in um.
Il pli savens (73% dals cas cussegliads) han l'unfrenda e la persuna ch'ha fatg l'act enconuschì in l'auter avant. 56% da las persunas ch'han fatg las dumondas èn Svizras e Svizzers, e 92% han gì lur domicil en Svizra.
Il dumber da cussegliaziuns tar l'agid da victimas è creschì, cumpareglià cun l'onn 2000, sin il dubel. Il 2022 èn quai stà radund 46'500 cussegliaziuns.
