En Svizra sajan il 2021 radund 450’000 persunas stadas dischavantagiadas finanzialmain e sozialmain. Quai correspunda a 5% da la populaziun ch’ha stuì desister da rauba impurtanta, servetschs u activitads socialas pervi da mancanza da daners – sco las cifras actualas da l’Uffizi federal da statistica mussan. Er ha in tschintgavel da las chasadas betg pudì pajar expensas nunspetgadas.
En l’Uniun europeica saja questa quota en media stada passa duas giadas uschè gronda. Dals pajais vischins saja la quota da quest dischavantatg material e social be stada en l’Austria levet pli bassa ch’èn Svizra.
2'289 francs per mais
La limita da povradad vegn deducida tenor l’Uffizi federal da statistica da las directivas da la Conferenza svizra da l'agid social. 2021 è quella stada en media tar 2’289 francs il mais per ina persuna singula e 3'989 francs per dus creschids cun dus uffants.
Da quai ston vegnir pajadas las expensas dal basegn quotidian sco er ils custs d’abitar. Las premias per l’assicuranza obligatorica per la tgira da malsauns vegnan – sco las contribuziuns da l’assicuranza sociala, las taglias ed eventuals aliments – deducidas ordavant da las entradas dal tegnairchasa.
