Las bancas Raiffeisen vulan vegnir pli datiers als clients e promover innovaziuns. Il cussegl d'administraziun da Raiffeisen Svizra ha deliberà la nova strategia per ils onns 2021 fin 2025. Per cuntanscher las finamiras investescha la gruppa da bancas 550 milliuns francs ils proxims tschintg onns, sco la Raiffeisen communitgescha.
Davent dal 2025 quinta Raiffeisen Svizra lura da prender en annualmain radund ina mesa milliarda francs dapli, grazia a gudogns tras effizienza ed entradas supplementaras. La gruppa vul d'auzar las cumparts al martgà en tut ils secturs da fatschenta fin il 2025 – quai surtut en las fatschentas da cumissiuns e da servetschs.
Model decentral resta
La stretga colliaziun tranter las bancas Raiffeisen e lur societaris duai en futur anc vegnir rinforzada. Uschia vegn per exempel il barat cun ils commembers reorganisà ed intensivà via chanals digitals.
La terz-gronda gruppa da bancas da la Svizra vul schlargiar las fatschentas da proprietad d'abitar, da clients d'interpresas, d'investiziuns ed er da prevenziun per la vegliadetgna. En mira ha la banca surtut clients cun ina facultad pitschna u mesauna. Quels vul la banca cussegliar cun schliaziuns simplas.
