Siglir tar il cuntegn

Header

cuntegn

Studi Homeschooling ha er gì effects positivs

In studi da l'universitad da Turitg ha mussà ch'il temp da cumenzar la scola la bun'ura, ha gì in effect positiv sin la sanadad e la qualitad da viver da giuvenils. Quai resulta d'ina examinaziun durant las serradas da scola durant la pandemia.

Il lockdown parzial durant l'emprima unda da corona, la primavaira pasada ha gì in effect sin la luna da scolaras e scolars, quai mussan blers studis. Sintoms depressivs e temas èn s'augmentadas, la cuntentientscha e la qualitad da viver sajan sa sbassadas. In effect ch'è dentant fin uss anc betg vegnì resguardà fitg savens ha dentant gì il cuntrari efect. Perquai che las scolas eran serradas, è er crudà davent il viadi da scola, uschia che giuvenils han pudì durmir pli ditg la bun'ura. Quai va a prà meglier cun lur ritmus natiral da durmir.

Pli pauc alcohol, dapli qualitad da viver

In team da l'Universitad Turitg ha rapportà che gimnasiastas e gimnasiasts hajan pudì durmir durant l'emna en media 75 minutas pli ditg, perquai ch'els hajan stuì sa mudregiar pli tard or da letg. Il medem mument saja lur qualitad da viver sa meglierada a moda signifitganta ed il consum d'alcohol e da cafein è sa reduzì.

Numerus studis mussian ch'il deficit da durmir e la mancanza da sien giajain maun en maun cun pli schleta luna, problems da concentraziun e d'attenziun sco er cun stancladad, tema ed il betg sa sentir bain.

Pandemia pegiurescha puspè l'effect

Per il studi èn vegnids cumparegliads ils resultats da duas enquistas. Per l'ina han ils scienziads dumandà 3'664 scolaras e scolars da 21 gimnasis da Turitg co els dorman e davart lur qualitad da viver. Quai durant il lockdown la primavaira. Ultra da quai è er in studi d'avant la pandemia vegnì resguardà. Quel han ins fatg l'onn 2017 cun 5'308 scolaras e scolars.

Ils scienziads supponan che l'effect positiv dal durmir pli ditg fiss pli grond, sche la chargia psichica entras la pandemia na fiss betg vegnida vidlonder.

RTR novitads 17:00

Artitgels legids il pli savens

Scrollar a sanestra Scrollar a dretga