Mintga terza interpresa en Svizra fa pajaments da corrupziun a l'exteriur, quai mussa in studi fatg da la Scol'auta spezialisada dal Grischun per incumbensa da «Transparency International». Quai malgrà mesiras d'anticorrupziun ch'èn vegnidas rinforzadas ils davos onns. 539 interpresas svizras ch'èn activas en l'exteriur – da differentas grondezzas e branschas – han fatg part a questa retschertga online. Tenor ils auturs saja in terz da las firmas dumandadas sa participà, uschia ch'ils resultats sajan signifitgants.
Sectur public er pertutgà
La corrupziun è derasada en il sectur privat, ma er en il sectur public. In quart da las firmas pertutgadas inditgescha, ch'i hajan pers incumbensas potenzialas pervi da concurrents corrupts durant ils ultims dus onns. Quai è oravant tut stà il cas en il sectur privat sco er public dals pajais Italia, China, Russia e Germania. Schizunt davart la polizia ed il dazi vegnian dumondas per pajaments corrupts.
Il risico da corrupziun ha ina influenza sin la decisiun da far fatschentas en tscherts pajais exteriurs. Quasi mintga setavla fatschenta desista per exempel da far fatschentas en pajais sco la Russia, l'Iran u l'Urcaina.
Prevenziun e consequenzas insuffizientas
Pir dapi circa l'onn 2000 ha la corrupziun cumenzà ad avair consequenzas per fatschentas svizras. Avant valevan tals pajaments corrupts schizunt sco necessaris per tscherts pajais exteriurs. Las mesiras da prevenziun – per exempel la documentaziun a scrit da tut las transacziuns commerzialas – èn dentant strusch sa midadas ils ultims 20 onns ed èn vinavant insuffizientas.
Plinavant vegnan, tenor ils auturs dal studi, cas da corrupziun strusch avant dretgira. Ils ultims 20 onns èn be 11 cas d'interpresas svizras stads avant dretgira.