La SRG SSR rinforza sia transfurmaziun «Enavant SRG SSR» per daventar ina organisaziun da medias pli digitala, effizienta e flexibla. Per rinforzar la direcziun en quest process vegnan integrads trais profils supplementars:
- Roger Elsener – directur SRF
- Nicolas Pernet – directur Purschida
- Moritz Stadler – directur Operaziuns
Nicolas Pernet daventa nov directur Purschida – RTR en tschertga
Nicolas Pernet, actualmain directur RTR e vicedirectur general da la SSR, surpiglia a partir dal prim d'avrigl 2026 la direcziun dal sectur nov Purschida. En il futur è el responsabel per cuntegns centrals da la SSR – tranter auter per Play+, ficziun e sport – ed orientescha quels en l'entira SSR a moda unitara sin ils basegns dal public e per l'utilisaziun digitala. Pernet porta cun sai experientscha da plirs onns en ils secturs cuntegns medials, distribuziun e svilup da products. Sia posiziun tar RTR vegn scritta ora extern, ina squadra transitorica maina ad interim.
Nicolas Pernet maina dapi il 2021 RTR ed è dapi il 2025 vicedirectur general da la SRG SSR, dentant er co-manader dal project da transfurmaziun «Enavant». L’Engiadinais da 46 onns ha studegià economia a Son Gagl e doctorà il 2010 suenter segiurns a Michigan e Paris. Avant sia lavur tar la SRG SSR è el stà bunamain 10 onns tar Ringier en funcziuns directivas en il marketing, il publishing e la gestiun commerziala. Pernet è maridà, bab e viva ad Egg ed a Cuira.
Gia ils proxims dis vegnia la plazza per la successiun da Nicolas Pernet scritta ora. La nova directura u il nov directur da RTR dovria enconuschientschas approfundadas da la lingua rumantscha, abilitads da manar ed ir a prà cun la cultura en chasa RTR, di il president da la SRG.R Vincent Augustin. La nova persuna stoppia responsar la publicistica sco er producziun regiunala en il chantun Grischun.
Las incumbensas vegnian dentant a sa midar en cumparegliaziun cun quellas dad oz perquai che la SRG SSR sto sa transfurmar cun il project da spargn «Enavant». Las partiziuns finanzas, tecnica e persunal vegnan en l'avegnir manadas centralmain da Berna, la nova persuna a la testa sto responsar tut il rest dal manaschi. Sco Augustin di, tut quai ch'interessescha il public. La finamira saja dad eleger il nov directur u la nova directura avant la stad. Enfin lura surpiglian las quatter persunas ch'èn part da la direcziun las incumbensas dal directur vacant.
Roger Elsener nov directur SRF
Roger Elsener surpiglia a partir dal matg la direcziun da SRF.
Il CEO da Zattoo da fin qua haja experientscha cumplessiva en il commerzi da radio, televisiun e streaming e duai far avanzar la digitalisaziun sco era l'ulteriur svilup dals cuntegns da la purschida da SRF, particularmain per giuvnas gruppas en mira.
Tranter auter cun sia cumpetenza da medias strategica ha el persvadì tant la suprastanza regiunala SRG Deutschschweiz sco era la directura generala. Elsener succeda a Nathalie Wappler che banduna SRF la fin d'avrigl.
Moritz Stadler nov directur Operaziuns
Il prim d'avrigl 2026 surpiglia Moritz Stadler la direcziun dal sectur Operaziuns che concentrescha la producziun e la tecnologia sut in tetg.
Il manader vertent dal stream Operaziuns en il project «Enavant» ha experientscha operativa internaziunala, tranter auter en il rom dal Eurovision Song Contest e tar la EBU.
Stadler duai rinforzar la collavuraziun naziunala e garantir standards tecnologics unitars per tut las regiuns linguisticas – quai ch'è central per l'effizienza, la qualitad e la segirezza da process.