- Il cusseglier naziunal da Son Gagl Marcel Dobler ha interess per il post da president da partida da la PLD.
- El veglia daventar successur da Petra Gössi che chala la fin da l'onn, ha ditg Dobler en in'intervista cun la gruppa da medias CH-Media.
- Per el vegnia en dumonda sulet in co-presidi, ha ditg Dobler. Per l'ina pervi da motivs da temp e per l'autra pervi da sias enconuschientschas da franzos.
Dobler ha laschà avert cun tgi ch'el veglia manar la partida en in co-presidi. El na ditgia betg cun tgi ch'el sondeschia il terren. Sch'i na dettia nagin ticket dubel u sch'i dettia ina meglra candidatura singula veglia el desister d'ina candidatura.
Dobler ha fundà l'interpresa Digitec ch'è vegnida surpigliada da la Migros. Dapi il 2018 è el cusseglier administrativ e cunpossessur da la Franz Carl Weber SA.
Marcel Dobler ha 40 onns e dapi il 2015 cusseglier naziunal. El è er stà sportist d'elita en il decatlon, en la concurrenza multidisciplinara ed en il sport da bob. El è maridà ed ha dus uffants.
Elecziun l'october
La partida liberaldemocratica vul eleger la successura u il successur per Petra Gössi ils dus d'october. La cumissiun da tschertga vegn presidiada da Saskia Schenker.
