Ina presidenta u in president grischun na datti betg sco proxim per la Partida liberaldemocratica. Tant la cussegliera naziunala Anna Giacometti sco er il cusseglier dals chantuns Martin Schmid na vulan betg surpigliar La PLD Svizra. Dentant fissi per Anna Giacometti temp ch'ina dunna surpiglia puspè il presidi.
Las dunnas vesan ils problems sin quest mund in pau auter, perquai pens jau ch'ina dunna pudess tut tenor represchentar meglier tut ils interess entaifer la partida.
Anna Giacometti politisescha plitost en l'ala sanestra da la PLD, auter che Thierry Burkart, il president actual che ha annunzià la demissiun per ils 18 d'october. Sut il presidi da l'advocat da l'Argovia s'ha posiziunà la partida pli ferm a dretga. Quai che sa mussa tant tar dumondas ecologicas sco tar dumondas da migraziun.
«Igl ha effectivamain dà ina roschada a dretga en la partida sut Thierry Burkart, da l'autra vart stoss jau dir ch'el ha fatg in bun job sco president da partida», ha ditg Anna Giacometti. «El è adina sa preschentà fitg bain, a moda fitg credibla cun bunas enconuschientschas dals dossiers ed ha propi pudì represchentar fitg bain la partida. Quai ha lura er gì in effect positiv en la coesiun da la partida. Per quai stoss jau propi far in grond cumpliment ad el.»
Igl ha effectivamain dà ina roschada a dretga en la partida sut Thierry Burkart, da l'autra vart stoss jau dir ch'el ha fatg in bun job sco president da partida.
Be cumpliments per Thierry Burkart ha il cusseglier dals chantuns grischun Martin Schmid. Sco Thierry Burkart è era el advocat ed els dus sesan en la medema lingia en la chombra gronda. Sin la medema lingia èn els er sch'i va per la politica. Uschia saja la PLD sa posiziunada pli cler che avant, ha ditg il politicher grischun. El deplorescha dentant la decisiun da Burkart da demissiunar.
Tenor mai è la PLD uss posiziunada pli cler che avant. Dentant sa midan era l’ambient ed era las partidas sa midan. Jau benevent che la PLD è uss posiziunada claramain sco partida dretg dal center. Quai correspunda era a mes agen profil. Perquai deploresch jau era che Thierry Burkart chala.
Gugent fiss Martin Schmid er ì en las elecziuns sut il timun da Thierry Burkart. Perquai sa giavischa el per in proxim president u ina proxima presidenta insatgi che cuntinuescha la lavur da Burkart. Dentant èsi ina sfida da chattar in president u ina presidenta, di Martin Schmid. L'attenziun ed oravant tut la pressiun saja creschida per quest post. Perquai vul Martin Schmid insatgi che sa ir enturn cun tut quella pressiun ch'in tal presidi da la partida maina cun sai.
La pressiun sin ils presidents e las presidentas da partida è creschida. Ins sto savair ir enturn cun tut la critica che spetga. Jau ma giavisch ina persuna che sa ir enturn cun quel squitsch e che sa manar la partida en il futur per il bun da la populaziun.
Ina dumonda che vegn ad esser decisiva per la tscherna da la nova persuna al timun è la dumonda per ils novs contracts cun l'Uniun europeica. En questa dumonda è la Partida liberaldemocratica numnadamain anc fitg indecisa – respectivamain betg tuts che han la medema opiniun.
Cun quai ston ins savair ir enturn. I dat en bleras partidas dumondas dal fatg nua che betg tuts èn da perina. Gist en la partida liberala ston ins acceptar sche betg tuts han la medema opiniun. Quai è part dal gieu.
Martin Schmid sez na vuleva anc betg prender posiziun davart ils novs contracts. Per Anna Giacometti èsi dentant cler ch'ella sustegna la via bilaterala.
Jau sustegn en mintga cas la via bilaterala, pia in cler Gea als bilaterals III.
Tge lingia che la nova presidenta u il nov president va sa mussan en intgins mais. Ils 18 d'october elegian ils delegads ina nova persuna che duai lura manar la PLD en las proximas elecziuns sperond che la partida po fruntar las perditas d'electuras ed electurs tant sin nivel naziunal sco er chantunal.
Thierry Burkart sa retira suenter 4 onns
Il president da partida da la PLD, Thierry Burkart, sa retira. Quai communitgescha la partida. El vul dar giu ses uffizi l'october – radund dus onns avant las proximas elecziuns naziunalas. Per chattar ina successiun ha la partida installà ina cumissiun da recrutaziun.
Dapi var quatter onns è Thierry Burkart president da la PLD. Il 2021 aveva el surpiglià il presidi sco successur da Petra Gössi. Uss veglia l'advocat da 49 onns da l'Argovia puspè sa focussar sin la politica dals fatgs sco cusseglier dals chantuns, e sa deditgar dapli a sias activitads professiunalas. Quai scriva la partida en ina communicaziun.
