Igl è capità l'atun passà. La gruppa da hackers ominusa Akira è entrada en ils sistems da la firma affiliada da la Ruag en ils Stadis Unids da l'America Ruag LLC ed ha engulà là grondas quantitads da datas. Lura ha ella extorcà la Ruag: u ch'il manaschi federal duai pajar – u che las datas militaras apparentamain confidenzialas da la firma affiliada a la Ruag vegnian publitgadas. SRF aveva fatg public l'extorsiun.
Uss vegn enconuschent che la Ruag è entrada sin l'extorsiun. «Nus avain pajà ed avain per fortuna survegnì enavos tut las datas», di il president dal cussegl d'administraziun da la Ruag Jürg Rötheli en la Samstagsrundschau da SRF.
Il concern federal cuntrafa a la recumandaziun federala
La Ruag haja pajà in «import pli pitschen», di Rötheli. Pli concret na vul el betg daventar. Tenor rapports da medias ha la gruppa da hackers Akira midà l'ultim temp sia strategia. Ella attatga pli savens interpresas pli pitschnas e metta paisa sin in grond dumber da cas empè da singulas summas grondas. I vegn discurrì da pretensiuns da daners da liberaziun en rom bass da sis cifras.
Picant è che gist in concern federal ceda extorcaders. La Confederaziun recumonda numnadamain cun insistenza da betg pajar daners da liberaziun. Quai servia a finanziar activitads criminalas, scriva l'Uffizi federal per la segirezza da cyber en in mussavia sin sia pagina-web. Mintga extorsiun da success motiveschia ils attatgaders da cuntinuar e promovia la derasaziun da talas attatgas.
VBS betg stà infurmà
Il president da Ruag Rötheli sa che ses concern ha agì cunter las recumandaziuns da ses agen proprietari. «Nus essan sa cunvegnids correspundentamain», di Rötheli. Cun cunvegnas sajan manegiads discurs cun gremis interns da l'interpresa, precisescha la Ruag sin dumonda. Er haja il concern d'armament sa laschà cussegliar d'experts da dretg dals Stadis Unids. La decisiun davart il pajament haja la Ruag prendì en il rom da sia cumpetenza ed independenza d'interpresa.
Il Departament da defensiun (VBS) represchenta la Confederaziun sco proprietaria da la Ruag. El scriva sin dumonda: Il VBS na saja betg vegnì infurmà avant il pajament. Il fatg ch'in concern federal haja pajà daners da liberaziun na veglian ins il mument betg commentar.
«Pajament è in signal desastrus»
Pli cler vegn il cusseglier naziunal da la PPS e politicher da segirezza Mauro Tuena, ch'è sez interprendider dad IT. «Jau sun schoccà», di Tuena. «Questa gruppaziun da hackers sa ussa che la Confederaziun è pronta da pajar daners da liberaziun – quest signal vers anora è desastrus.» I n'emportia betg che la Ruag sco societad anonima en possess da la Confederaziun na tutgia betg tar l'Administraziun federala sezza. Ultra da quai crititgescha Tuena che la Ruag haja fatg public il pajament. «Quai na duess ins mai communitgar vers anora. Mintga pajament dat numnadamain schlantsch als hackers, perquai ch'ins sa ch'i vegn pajà.»
La Ruag percunter defenda il pajament. La decisiun saja stada gista, scriva il concern federal. Quai mussia il fatg ch'ins haja pudì survegnir enavos tut las datas e limitar il donn finanzial e da segirezza sin in minimum.