Siglir tar il cuntegn

Header

cuntegn

Svizra Dumber da concurs s'augmenta per in terz

Bleras interpresas ston serrar las portas quest onn en Svizra. Dal schaner fin l'october èn radund 5'500 firmas idas concurs, quai munta in plus da 35% cumpareglià cun il 2021. Quai mussa in studi da l'interpresa d'incasso Creditreform.

Ina raschun per l'augment fitg ferm saja che bleras firmas hajan survegnì agid finanzial dal stadi durant la pandemia da Covid-19. Firmas ch'eran pia gia avant la crisa en problems han survivì grazia a quest sustegn finanzial. Sch'ins cumpareglia cun avant la pandemia, èsi anc adina 8% dapli interpresas che han fatg concurs.

Pli paucs concurs en il Grischun

Il Grischun è in'excepziun cun perfin 23% pli paucs concurs che l'onn 2021. Il pli fitg è la quota da concurs s'augmentada en il chantun Zug. Là datti 63% dapli bancruts d'interpresas. Ina auta cumpart da concurs nodan surtut las branschas d'informatica, finanzas, assicuranzas e construcziun da maschinas.

Per l'entir onn spetga Creditreform in nov record da concurs. Passa 6'600 firmas na vegnian betg a surviver, uschia la prognosa.

audio
Per tadlar: las novitads da las 08:00
ord RTR Audio dals 07.11.2022.
laschar ir. Durada: 6 minutas 19 Secundas.

RTR novitads 08:00

Artitgels legids il pli savens

Scrollar a sanestra Scrollar a dretga