L’electricitad sa lascha accumular be a moda fitg limitada. Cunquai che las chasadas e las firmas svizras han consumà il settember 13% damain electricitad ch’usità, hai dà dapli energia danvanz per il commerzi cun l’exteriur. Tenor las datas da Swissgrid ha la Svizra exportà il mais passà 4,4% dapli electricitad cumpareglià cun il medem mais dals onns precedents.
Exportà cunzunt en l'Italia
La pli blera energia è ida en l’Italia, passa 1'700 uras gigawatt il settember. Quai correspunda a bunamain la mesadad da l'energia duvrada en Svizra ubain bunamain dus terzs da l’electrizitad exportada. Dasperas cumpran era la Germania, la Frantscha e l’Austria forza electrica da la Svizra.
Dentant era importà dapli
Perquai che l’electricitad è vegnida bler pli chara ils ultims mais, èn era las expensas per importar electricitad creschidas. Fin ussa ha la Svizra cumprà quest onn electricitad en la valur da circa 5,6 milliardas francs. Las expensas èn sa multiplitgadas per passa trais giadas cumpareglià cun l’onn avant. Tut en tut ha la Svizra uschia impundì quest onn - auter ch’ils onns passads - in pau dapli per imports d’electricitad che cun exports.
