Il Cussegl federal ha la mesemna danovamain discutà davart il proceder en las relaziuns cun l’Uniun europeica. El haja dà l’incumbensa da preparar l’uschenumnada «Agenda da la Svizra», ha confermà il president da la Confederaziun Ignazio Cassis.
En ina da sias proximas sesidas vul il Cussegl federal approfundar il tema. Quai ha agiuntà il pledader dal Cussegl federal, André Simonazzi.
Dapi ch’ils discurs davart ina cunvegna da basa han fatg naufragi il matg passà, spetga l’UE sin ina proposta da la Svizra. Ina data per in inscunter na dettia anc betg, ha communitgà la cumissiun da l’UE sin dumonda da l’agentura da novitads Keystone-SDA.
