-
Bild 1 von 3. L'areal da la Bernexpo è emplenì. Surtut glieud giuvna e classas da scola èn avant lieu. Bildquelle: RTR.
-
Bild 2 von 3. En differentas hallas ed en tendas s'han 120 differentas professiuns sa drizzadas en. Bildquelle: RTR.
-
Bild 3 von 3. Inua ch'ins guarda: dapertut ina pruna glieud. Bildquelle: RTR.
Ils Swiss Skills èn ils campiunadis da professiuns per persunas giuvnas che fan in emprendissadi. L’occurrenza ha lieu dals 17 enfin ils 21 settember 2025 a Berna sin l'areal da la Expo. Igl è la quarta giada che emprendists ed emprendistas da 90 professiuns sa mesiran. Per l’emprima giada han ils Swiss Skills gì lieu il 2014 a Berna. Questa giada prendan part 1'100 emprendistas ed emprendists. Ils organisaturs fan quint cun 120'000 visitaders e visitadras – tranter auter classas da scola, persunas privatas e famiglias. Sper las cumpetiziuns datti era anc exposiziuns da diversas professiuns – en tut 150.
Trais dal Grischun en la concurrenza da puras e purs
Tar la professiun pur e pura fan part 36 emprendistas ed emprendists. Trais dals participants èn dal Grischun. Clau Deplazes, Andrin Largiadèr e Dario Battaglia èn sa preparads ensemen per il campiunadi. Als examens dals Swiss Skills ston els cumbatter in encunter l'auter. Mo in dals emprendists u da las emprendistas po gudagnar il campiunadi.
Durant l'exam ston ils purs e las puras ir tras quatter posts:
- tegnair animals
- cultivaziun da plantas
- mecanisaziun
- conturn da lavur
Las emprendistas ed ils emprendists ston identifitgar plantas, manischar ina maschina da semnar, valitar animals, far part ad ina concurrenza da mulscher e savair chargiar e stgargiar in char cun ballas da fain. Durant il final ston els ed ellas planisar d’engraschar ils champs, concepir e decorar in stan da martgà e far in percurs cun il tractor.
-
Bild 1 von 2. Ina da las grondas tendas è quella da la puraria. Glieud interessanda chamina enturn ed ils animals fan patgific. Bildquelle: RTR.
-
Bild 2 von 2. Era ils viticulturs èn da la partida e laschan sagiar vin. Bildquelle: RTR.
In cuc tar in spezialist da hotellaria e d’economia da chasa
Tar ils Swiss Skills da quest onn datti otg emprendistas ed emprendists che fan part al campiunadi sco spezialist e spezialista da hotellaria e d'economia da chasa. Tar l'examen ston els far differentas lavurs sco per exempel drizzar en e decorar ina stanza tenor differents temas, far svanir flatgs d'ina cuverta, preparar ina buglia da Bircher e mussar co ch'els van enturn cun giasts.
La valitaziun vegn fatga da differents experts ed expertas. In dad els è Riet Scandella. El ha fatg l'emprendissadi sco cuschinunz e spezialist d'hotellaria. L'onn 2022 ha Riet Scandella sez fatg part als Swiss Skills ed è vegnì quart.