Quest onn èn stads bleras Grischunas e Grischuns sut ils megliers participants e las meglieras participantas.
Trais dal Grischun en la concurrenza da puras e purs – dentant betg en il final
Tar la professiun pur e pura han fatg part 36 emprendistas ed emprendists. Trais dals participants èn dal Grischun. Clau Deplazes, Andrin Largiadèr e Dario Battaglia eran sa preparads ensemen per il campiunadi. Als examens dals Swiss Skills han els stuì cumbatter in encunter l'auter. Mo in dals emprendists u da las emprendistas po gudagnar il campiunadi.
Durant l'examen han ils purs e las puras stuì ir tras quatter posts:
- tegnair animals
- cultivaziun da plantas
- mecanisaziun
- conturn da lavur
Las emprendistas ed ils emprendists ston identifitgar plantas, manischar ina maschina da semnar, valitar animals, far part ad ina concurrenza da mulscher e savair chargiar e stgargiar in char cun ballas da fain. Durant il final stuessan els ed ellas planisar d’engraschar ils champs, concepir e decorar in stan da martgà e far in percurs cun il tractor.
Deplorablamain n'hai dentant betg bastà per in dals trais Grischuns da vegnir en il final. Nagin dad els ha fatg avunda puncts per pudair cumbatter per il titel.
-
Bild 1 von 2. Ina da las grondas tendas è quella da la puraria. Glieud interessanda chamina enturn ed ils animals fan patgific. Bildquelle: RTR.
-
Bild 2 von 2. Era ils viticulturs èn da la partida e laschan sagiar vin. Bildquelle: RTR.
Ils Swiss Skills èn ils campiunadis da professiuns per persunas giuvnas che fan in emprendissadi. L’occurrenza ha gì lieu dals 17 fin ils 21 settember 2025 a Berna sin l'areal da la Expo. Igl è la quarta giada che emprendists ed emprendistas da 90 professiuns èn sa mesirads. Per l’emprima giada han ils Swiss Skills gì lieu il 2014 a Berna. Questa giada han prendì part 1'100 emprendistas ed emprendists. Ils organisaturs han fatg quint cun 120'000 visitaders e visitadras – tranter auter classas da scola, persunas privatas e famiglias. Sper las cumpetiziuns hai era anc dà exposiziuns da diversas professiuns – en tut 150.
Intginas impressiuns
-
Bild 1 von 3. L'areal da la Bernexpo è emplenì. Surtut glieud giuvna e classas da scola èn avant lieu. Bildquelle: RTR.
-
Bild 2 von 3. En differentas hallas ed en tendas s'han 120 differentas professiuns sa drizzadas en. Bildquelle: RTR.
-
Bild 3 von 3. Nua ch'ins guarda: dapertut ina pluna glieud. Bildquelle: RTR.
In cuc tar in spezialist da hotellaria e d’economia da chasa
Tar ils Swiss Skills da quest onn datti otg emprendistas ed emprendists che han fatg part al campiunadi sco spezialist e spezialista da hotellaria e d'economia da chasa. Tar l'examen han els stuì far differentas lavurs sco per exempel drizzar en e decorar ina stanza tenor differents temas, far svanir flatgs d'ina cuverta, preparar ina buglia da Bircher e mussar co ch'els van enturn cun giasts.
La valitaziun è vegnida fatga da differents experts ed expertas. In dad els è Riet Scandella. El ha fatg l'emprendissadi sco cuschinunz e spezialist d'hotellaria. L'onn 2022 ha Riet Scandella sez fatg part als Swiss Skills ed è vegnì quart.