L'institut svizzer per products terapeutics (Swissmedic) lubescha temporaramain ina vaccinaziun adattada a la varianta Omicron dal coronavirus. I sa tracta da la virola da l'interpresa americana Moderna. En studis ha la vaccinaziun dà dapli anticorps cunter la varianta dad Omicron che la vaccinaziun veglia da Moderna «Spikevax».
La virola è perquai in uschenumnà vaccin «bivalent», ina maschaida da dus vaccins. Ella cuntegn mRNA (messenger ribonucleic acid) cunter Omicron e mRNA cunter l'emprima varianta ch'è sa derasada da Wuhan al cumenzament da la pandemia.
Effects secundars sumegliants sco suenter segunda dosa da «Spikevax»
Ils effects secundars possian esser dolur, cotschnur u unfladira al lieu da l'injecziun, stancladad, mal il chau, snavurs e malesser. Novs problems da segirtad n'ha la Swissmedic betg constatà. E Moderna è vinavant obligà da surdar infurmaziuns davart segirtad, efficacitad e qualitad dal vaccin a Swissmedic. Swissmedic survegliescha quels aspects er en l'exteriur.
Producziun en il Vallais
Il nov vaccin duai per gronda part vegnir producì tar l'interpresa da farmazia Lonza en il Valais. Quai ha ditg il schef da la fatschenta d'Europa dal conzern american. Anc betg cler è cura ch'il nov booster stat a disposiziun per la populaziun.
