Tavau è cuntent
Il Landamann da Tavau Philipp Wilhelm tira in facit positiv dal 53avel Forum mundial d'economia. I saja adina bun, sch'i na dettia nagins incaps pli gronds durant il forum. Però per trair in facit pli detaglià saja anc memia baud. Ins stoppia ussa tschertgar la discussiun cun las persunas involvidas per pudair discutar, co che quellas han passentà ils dis al WEF e nua ch'i vesan potenzial per meglierar. Wilhelm constatescha ch'il WEF ha puspè survegnì la dimensiun dals onns avant la pandemia. Ins haja survegnì medem bleras dumondas per occupar localitads a la promenada da Tavau.
Er il chantun tira in facit positiv
La regenza grischuna fa ina bilantscha positiva da la 53avla ediziun dal Forum mundial d’economia a Tavau ch’è ì a fin oz. Tenor il cusseglier guvernativ Marcus Caduff ha la collavuraziun tranter ils differents servetschs funcziunà senza problems. Il chantun Grischun e la vischnanca da Tavau hajan rinforzà lur muntada sco lieu da congress. Er las demonstraziuns en connex cun il WEF 2023 sajan stadas paschaivlas.
«Neutralitad n'è nagina indifferenza»
Tenor il Cusseglier federal Alain Berset è la neutralitad da la Svizra vegnida chapida bain al WEF. Il parairi da la presidenta da la cumissiun da l'UE, Ursula Von der Leyen, che star a l'ur na saja nagina opziun, na saja betg stà ina critica envers la Svizra. El haja pudì declerar che la neutralitad na saja nagina indifferenza, uschia Berset avant las medias a Tavau.
El na craja betg che la Svizra possia vegnir fatga responsabla, perquai ch'ella na furneschia naginas armas. La Svizra haja da giugar ina rolla speziala. Quai hajan auters pajais chapì bain. Numerusas persunas da cader han mess en dumonda al WEF la neutralitad svizra.
Blers discurs bilaterals
Alain Berset ha er raquintà avant las medias da blers discurs bilaterals – ina part da quels er tar in bun raclette, sco per exempel cun il primminister da Luxemburg. Quests discurs a Tavau portian fitg bler a la Svizra, uschia il president da la Confederaziun vinavant. Mintgatant saja schizunt stà pussaivel da schliar pitschens problems. Tge ch'è dentant exact vegnì discutà e schlià, n'ha el sa chapescha betg pudì tradir.
Jau na sai betg quants contacts ch'jau hai gì quests dis – uschè blers. Sch'ins s'imaginescha, quant temp che quai avess duvrà senza la preschientscha al WEF.
Cunzunt er suenter trais onns pandemia, cun scuntradas mo virtualas sin visurs, saja bel da puspè s'inscuntrar endretg. Quai saja propi tut insatge auter, uschia Alain Berset.
