La Svizra ha schlargià sia capacitad per testar infecziuns cun il coronavirus. Entant possian ins testar mintga di 7’000 persunas, scriva la «NZZ am Sonntag» sa referind sin l’Uffizi federal da sanadad. En tut hajan ins fatg fin ussa passa 50’000 tests. Cun quai haja la Svizra ina da las ratas da test las pli autas dal mund.
Il glindesdi aveva il schef da l’organisaziun mundiala da la sanadad – Tedros Gebreyesus, appellà als pajais da testar dapli glieud sin il coronavirus. In fieu ch'ins sappia betg nua ch'el ardia, na possian ins er betg stizzar. Almain duas da trais persunas s'infecteschian tar insatgi che mussia nagins u be sintoms fitg miaivels, declera la epidemiologa Emma Hodcroft dal Biocenter a Basilea. D'evitar saja quai pia be sch'ins testeschia sistematicamain mintga cas da suspect.
Proceder pretensius
L'Uffizi federal da sanadad BAG ha fin uss cusseglià ils chantuns da testar mo persunas che han sintoms che vegnan menders u pazients che tutgan tar la gruppa da risico.
Raschun è che la capacitad per testar è limitada. Fin avant curt ha Daniel Koch dal BAG declerà ch'i dettia en Svizra capacitads per 2'500 tests a di. Entant ha quest dumber pudì vegnir augmentà sin 7'000 tests a di, ha il BAG fatg a savair. Total hajan ins fatg radund 50'000 tests fin venderdi da quest'emna.
Roche ha problems da furnir
En il chantun Berna, han ins vulì introducir drive-ins per sa laschar testar. Tar quals pudess ins be ir tras cun l'auto ed i vegn fatg là in sfrusch. 1'000 tests a di avevan ins previs. Uss vegn il project dentant spustà, perquai che la firma Roche ha problems da furnir ils tests.
Alternativas per il test da Roche datti be paucas e quellas betg fitg exactas. Per exempel pon ins mesirar en il sang ils anticorpuls ch'il corp producescha per cumbatter il virus. Problem è dentant, che quels cumparan pir suenter ch'ins ha gia gì il virus per radund in'emna. Fin lura han ins probabel gia infectà ina rotscha autras persunas.