Patricia Danzi – scheffa da la Direcziun da svilup e da collavuraziun Deza
Ils dis da Patricia Danzi al WEF èn plains. Inscunters cun ministers, cun organisaziuns u investuras ed investurs per projects. Dentant er sch'ella è tutta di sin zac, cumenza il di dad ella a Tavau cun ir a currer in mument. Uschia possia ella tancar energia per tut ils inscunters che s'accumuleschan al WEF.
Gita Gopinath – vicedirectura dal fond monetar internaziunal
L'economa oriunda da l'India ha discurrì a diversas occurrenzas al WEF en sia funcziun. Cunzunt l'inflaziun sin l'entir mund è in tema che fatschenta ella. Quella saja sa resultada pervi da differentas raschuns. Per ina haja la fin da la pandemia manà ad ina pli gronda dumonda da bains e per l'autra haja er la guerra en l'Ucraina manà a pretschs d'energia e da mangiativas pli auts. Perquai saja fitg impurtant ch'ils pajais collavuran. Uschia ch'il motto dal WEF «Collavurar en in mund fragmentà» na saja betg be ina floscla.
Reed Tuckson – medi che s'engascha per egualitad
Il medi ch'è stà ils onns 80 responsabel per la sanadad publica a Washington D.C. ha tranter auter fatg part ad in podi en il House of Africa. Avant radund 50 persunas ha el discurrì davart las sfidas da persunas da pel stgira en ils Stadis Unids durant la pandemia. Las sfidas en il sectur da sanadad da persunas da colur accumpognian el schon durant si'entira vita. «Jau vi ch'ils umans survivan e ch'els pon viver la megliera vita pussaivla. E la sanadad è naturalmain centrala per quai».
Reto Knutti – climatolog e professer a la Scola politecnica federala da Turitg
Sceptic ha Reto Knutti guardà vers il WEF. Il climatolog ha survegnì in invit da sa participar ad in podi ed uschia decis dad ir per l'emprima giada al WEF. Suenter in pèr dis al WEF ha’l stuì conceder ch’el era forsa memia sceptic. Igl èn sa dads divers inscunters nua ch’el ha pudì barattar ideas cun persunas da tut il mund. Er ha el participà ad in podi. L'interess vi da sia persuna era grond.
Marcel Klucker – funtaner a Tavau
Marcel Klucker sa ch'igl è da spetgar accidents durant il WEF. Las vias èn fullanadas, ed uschia vegn in u l'auter idrant sut il auto en. Cunzunt sch'ils chamiuns da l'armada n'hajan mintgatant betg il endretg profil sin ils pneus.
Pli gronds incaps cun l'aua hai tenor Marcel Klucker mai dà. Polizia ed armada gidan a segirar quella durant il WEF. Vi dad in singul pitschen incap sa regord'el. La polizia ha duvrà in idrant per spaventar demonstrants cun sprizzar durant l'enviern. Silsuenter n'ha dentant nagin svidà puspè il idrant, ed el è sfradentà.
Bineta Diop – femmes Africa Solidarité
Ella è al WEF sco represchentanta da la societad, di Bineta Diop. La dunna dal Senegal s'engascha per ils dretgs da las dunnas da l'Africa, ma er en general per ses continent.
Bineta Diop di che tuttas crisas mundialas vegnian insacura er in problem per l'Africa. Ella numna la midada dal clima che chaschuna sitgiras en l'Africa da l'Ost, u la guerra en l'Ucraina che fa pli char il graun e chaschuna fominas.
Ella pretenda ch'il mund n'explotia betg l'Africa, mabain investeschia en ella. Il continent haja da porscher ina massa, ed i dettia blera glieud giuvna. En quella rendia d'investir. Il WEF è per Diop ina plattafurma che porta speranza da vegnir udida e per dar schlantsch al svilup en tut ils secturs.
