Las premias da las cassas da malsauns creschan il 2026 en media per 4,4% en Svizra. Quant ch'i è la fin finala, han las cassas da malsauns da communitgar fin la fin d'october. Alura ha la clientella temp fin la fin da november per midar la cassa da malsauns.
Per valitar, sche ina midada da la cassa da malsauns renda, pon ins cumparegliar las premias sin la plattafurma da la Confederaziun «priminfo» (guarda box). Quella è libra da reclama ed independenta. I vegn però recumandà da betg midar a moda tschorva simplamain a la cassa la pli favuraivla.
Cunzunt sch'ins vul in servetsch da clientella bain cuntanschibel, e vul survegnir restituì a moda speditiva quints dal medi. Tar retschertgas da cuntentientscha da clients sa plazzeschan las uschenumnadas cassas bunmartgadas dapi onns sin las ultimas plazzas. Tar talas poi ir fin a 30 dis fin ch'in quint dal medi vegn pajà enavos. Usità è ch'in quint vegn liquidà aifer 10 dis.
Plattafurma da cumparegliaziun www.priminfo.ch
Avrir la boxSerrar la box
Il portal cun infurmaziuns davart premias da cassas da malsauns da la Confederaziun www.priminfo.ch porscha ils suandants servetschs:
In quintader da premias: Tut las premias e reducziuns da tut las cassas da malsauns èn inditgadas. Ins po ordinar las premias tenor summa ed uschia quintar il potenzial da spargnar.
Ina rubrica «cussegliaziun da premias» cun infurmaziuns davart temas sco assicuranza da malsauns, tips per spargnar tar las premias e brevs da model.
Ina survista da premias.
Respostas sin las dumondas las pli frequentas (FAQ) ed infurmaziuns da contact (Hotline dal BAG).
Texts en lingua simpla.
Videos en lingua da segns.
Legenda:
Midar la cassa da malsauns; Probabel in hobi da be pauca glieud, dentant silmain insatge per spargnar raps ch'ins po duvrar l'onn proxim per rauba pli legraivla che per custs da medi.
Keystone
Termin per la midada
Midar cassa da malsauns pon ins mintgamai cun in temp da disditga d'in mais enfin ils 30 da november. Impurtant è d'avair la conferma da la nova cassa, avant ch'ins dat la disditga a la veglia. Quest pass surprenda ozendi en blers cas la nova cassa da malsauns. Per che tut ils termins da midada pon vegnir resguardads, fissi bun, sche la disditga vegniss tramessa cun ina brev inscritta enturn ils 15 da november. Lura duess quai tut funcziunar senza stress. Il nov contract vala alura a partir dal 1. da schaner.
Termins per midada en survista
Avrir la boxSerrar la box
Fin d'october: Las cassas da malsauns communitgeschan a lur clientella, co che la premia sa mida per il proxim onn.
Entschatta november: Cumparegliar las novas premias da las differentas cassas da malsauns, per exempel sin la plattafurma www.priminfo.ch.
Entschatta november: Tut tenor tscherner ina nova cassa da malsauns, s'annunziar tar ella e far il nov contract.
Enturn ils 15 da november, il pli tard cunter la fin da november: Trametter la disditga a la veglia cassa da malsauns cun ina brev inscritta (vegn savens fatg da la nova cassa da malsauns).
Per esser valaivla, sto la disditga esser arrivada il pli tard ils 30 da november tar la veglia cassa da malsauns. Sche la disditga arriva memia tard, rest'ins vinavant assicurà tar la veglia cassa da malsauns e na po betg pli midar ella fin l'onn sequent.
Assicuranza supplementara – qua vai auter
Tar l'assicuranza supplementara è il temp da disditga mintgamai 3 mais, quai il pli tard sin la fin da settember. Tar assicuranzas supplementaras èsi dentant cunzunt impurtant da disdir ellas pir, sch'ins ha ina conferma d'ina nova assicuranza supplementara. Auter che tar l'assicuranza da basa, che ha d'acceptar mintga nov client, n'è l'assicuranza supplementara betg obligada d'acceptar clients. Pia po ella refusar l'assicuranza tut tenor, sch'il client ha per exempel gia ina malsogna existenta.
