Persunas giuvnas saja la pli impurtanta gruppa da clients per il traffic public. A quella conclusiun vegn la gruppa da lavur ch’ha elavurà las mesiras. Quella gruppa stettia a l’entschatta da lur mobilitad e possian anc vegnir influenzads a favur dal traffic public.
Purschida pli attractiva
Ina pussaivladad per cuntanscher giuvens saja, da render pli visibel il traffic public en la scola. En connex cun temas da transport e viadis duain las differentas furmas ed ils avantatgs dal traffic public gia vegnir tematisads en las scolas primaras.
Sper quai duain vegnir creadas purschidas spezialas per uffants e persunas giuvnas. Uffants sut 18 onns che possedan gia in abunament duain per exempel savair prender cun els in collega u ina collega per in pretsch reducì. Abunaments spezialmain per persunas giuvnas duain vegnir pli favuraivels e cumpigliar dapli prestaziuns.
Tschintg onns temp
Cun las mesiras spera la branscha da pudair augmentar il cumpart dal traffic public ils proxims onns. Ils commembers da l’Uniun dals transports publics duain realisar las mesiras ils proxims tschintg onns.
