Siglir tar il cuntegn

Header

audio
Cussegl federal vul anc far in'emprova cun E-voting
Or da Actualitad dals 03.03.2023. Maletg: Keystone
laschar ir. Durada: 3 minutas 5 Secundas.
cuntegn

Trais chantuns dastgan Cussegl federal lubescha emprovas d'e-voting

Ils 18 da zercladur a las votaziuns naziunalas pon intginas persunas en Svizra votar electronicamain. Trais chantuns han dumandà per ina lubientscha per e-voting. Il Cussegl federal ha approvà quai. Radund 65'000 persunas han uschia la pussaivladad da vuschar electronicamain. Quai èn cunzunt persunas svizras en l'exteriur, dentant er persunas cun impediments. Dumandà per la lubientscha han ils chantuns Basilea-Citad, Son Gagl e Turgovia.

Uschia cuntinueschan las emprovas cun il sistem dad e-voting. Quellas aveva il Cussegl federal interrut 2019, pervi da problems da segirtad. La lubientscha per las novas emprovas valan fin ils 18 da mars 2025. Per elecziuns naziunalas ston chantuns inoltrar in'ulteriura dumonda.

Sistem segir avunda

La Posta ha meglierà ses sistem dapi il 2019. Il 2021 ha La Posta publitgà il code e la documentaziun dal sistem ed ha testa quel era cun in test public. Experts ed expertas independentas han controllà il sistem. Lur rapport è vegnì publitgà oz. Il Cussegl federal ha perquai decis, ch'il sistem è vegnì meglierà avunda per lubir il diever en il rom limità da quels novs tests.

Per e-voting lubescha la Confederaziun be sistems che pon vegnir verifitgads cumplainamain. Quai munta ch'ins po cun codes da test e cun metodas matematicas cumprovar sch'i ha dà manipulaziuns e reagir sin quellas. Plinavant dastgan be 30% da las vuschs d'in chantun esser electronicas e maximalmain 10% da tut las vuschs en Svizra.

RTR novitads 14:00

Artitgels legids il pli savens