Swisstransplant è l'instituziun ch'aveva lantschà il register per donaziuns d'organs l'onn 2018. L'entschatta da l'onn ha Kassensturz, il magazin per consuments da SRF, fatg attent els, che quel register haja differentas mancanzas da segirtad. Sinaquai ha Swisstransplant serrà las registraziuns e dapi la fin d'october han els decidì da serrar tut ils access er per ospitals. Franz Immer, il mainafatschenta da Swisstransplant, declera, ch'il process per registrar na saja betg stà segir.
Situaziun actuala
Uss, cura ch'i na dat nagin register, stoppian ospitals s’infurmar sch'ils pazients possedan ina carta da donaziun, sche la decisiun saja nudada en il testament dal pazient u sche la famiglia saja infurmada. Il pledader da medias da l'ospital chantunal a Cuira di ch'i na saja entant betg tragic ch'il register naja saja betg accessibel. Per els na midia betg bler. Els fetschian uschè ni uschia il discurs cun las famiglias per eruir il giavisch da donaziun. Ponderaziuns, da betg serrar il register sajan vegnidas fatgas, mo quai na fiss betg stada la dretga decisiun, di Franz Immer.
Protecziun da datas
En general saja la protecziun da datas fitg impurtanta ed en questa situaziun stuess ins reflectar, sch'ina vita umana na fiss betg pli impurtanta che la protecziun da datas.
Jau sun da principi da l'avis che la protecziun da datas saja impurtanta, ma i dat situaziuns nua che la vita umana u ina decisiun è pli impurtanta.
Plinavant accentuescha Franz Immer ch'i saja donn ch'il register stoppia vegnir serrà, oravant tut per las persunas pertutgadas. Ma quai na duai betg esser la fin per registers da donaturs d’organs.
Nov register per donaziuns d'organs
L'onn 2024 duai vegnir lantschà in nov Register da la Confederaziun. Swisstransplant duai tgirar vinavant quest register, dentant sut la surveglianza dal BAG. En cumparegliaziun cul vegl register, duai il nov vegnir pli segir per datas grazia a las reglas da segirtad da la Confederaziun. Quest project è anc en lavur, uschia ch'il BAG na po anc betg dir dapli. Mez matg ha la populaziun acceptà la lescha per la donaziun d'organs. Uschia che tuts che na din betg explicitamain Na, valan automaticamain sco donaturs ni donaturas d'organs en cas da lur mort en l’ospital.
Bunas experientschas a l'exteriur
Ch'in tal register po esser fitg nizzaivel, mussan las bunas experientschas en auters pajais cun uschia in register. Era sch'il sistem na funcziuna per part betg en pajais vischinants, nua che pli pauc che 1% da la populaziun èn registrads sco donaturs u donaturas. En Svizra possia vegnir auter. Tenor Franz Immer stoppia tuttina vegnir quintà cun intginas sfidas per dumagnar las finamiras.
Jau na sun betg da l'avis che nus pudain inscriver l'emprim onn 10% da la populaziun en il register.
Pia saja tuttina anc in detg viadi fin che 10% da la populaziun saja protocollada en il register da la Confederaziun. Tenor il BAG saja vinavant impurtant da menziunar en scrit u a la famiglia tge giavisch ch'ins haja per eruir tgi che less donar organs e tgi betg.