Siglir tar il cuntegn

Header

In um che stritga tschigulatta sur ina maisa vi.
Legenda: Keystone
cuntegn

Tschigulatta Uschè pauca tschigulatta sco l'ultim ils onns 80

Dapi 40 onns n'han Svizras e Svizzers betg pli mangià uschè pauca tschigulatta. Numnadamain be 9,9 kilos per chau. L'emprima giada dapi l'onn 1982 è la summa per chau uschia crudada sut 10 kilos.

Perquai che restaurants, hotels e cafés èn stads serrads durant plirs mais, è la fatschenta cun giasts internaziunals prest stada inexistenta. Tenor Chocosuisse è la svieuta en l'intern da la Svizra, sa reducida per 15%. Quella sminuziun saja d'attribuir sulettamain a la tschigulatta indigena. Tschigulatta da l'exteriur percunter è schizunt vegnida importada per 1,8% dapli l'onn passà. La cumpart al martgà ha uschia pudì crescher sin 43%.

Er en la fatschenta principala, l'export, n'èsi betg ì bler meglier. Là è la svieuta sa reducida per stgars 13%. 70% da la tschigulatta producida en Svizra van en l'export. Total ha la branscha gì 1,53 milliardas francs pli pauca svieuta, quai èn 14% pli pauc che l'onn avant. La producziun da tschigulatta è l'onn passà er sa reducida per radund 10%.

Materias primas charas

Chocosuisse vesa la branscha er vinavant sut squitsch. Il start en l'onn 2021 hajan ins gì sfidas che sajan cuntinuadas. Il schaner saja la quantitad exportada sa reducida vinavant per 15,3%, ma l'import da tschigulatta da l'exteriur saja creschì per 5,4%.

Quest svilup vegnia sustegnì entras la protecziun al cunfin che saja asimmetrica. Uschia sajan tschertas materias primas en Svizra dubel uschè charas sco en l'exteriur, ha avertì la federaziun. Cun la pretensiun dals producents da zutger, da vulair fixar ina protecziun minimala da duana per zutger smanatschia in'ulteriura chareschia per las materias primas. Chocosuisse supplitgescha perquai la politica da desister da talas mesiras protecziunisticas.

Ord l'archiv:

video
Jessas, nagina tschigulatta pli!
Or da Nouvo RTR dals 27.04.2017.
laschar ir

RTR novitads 10:00

Artitgels legids il pli savens

Scrollar a sanestra Scrollar a dretga