Il tunnel da basa dal Ceneri è pront per il manaschi d'emprova. L'Uffizi federal da traffic ha dà glisch verda a la Viafier federala. I sa tracta da l'ultima fasa da preparaziun avant ch'il tunnel va en funcziun ils 13 da december. Ils viadis d'emprova pon vegnir fatgs cun trens da persunas e da rauba commerzials, ha communitgà l’uffizi federal.
Gia dapi il mars 2020 vegnan fatgs viadis d'emprova en il tunnel, per testar che tut ils sistems funcziunan. Pervi da la pandemia da corona avevan ins stuì interrumper ils tests per tschintg emnas. Ils 20 d'avrigl han ins puspè pudì cuntinuar cun las lavurs.
Il tunnel da basa dal Ceneri è passa 15,4 kilometers lung e maina da Camorino datiers da Bellinzona a Vezia datiers da Lugano. El è l'ultima part da la Nova lingia da viafier tras las Alps, la NEAT.
