A partir dals 2 da mars curseschan 7 trens dapli tras il tunnel da basa dal Gottard la fin d'emna. Sco quai che las Viafiers federalas han communitgà, auzian els il dumber da trens d'actualmain 31 sin nov 38 trens la fin d'emna. Uschia possian els metter a disposiziun 4300 ulteriurs plazs da seser. I dettia trais trens supplementars la sonda avantmezdi en direcziun sid e quatter trens supplementars la dumengia suentermezdi en direcziun nord.
Pendularis gudognan in'ura
A partir dals 25 da mars cursescha ultra da quai da glindesdi fin venderdi mintgamai in tren supplementar la damaun baud dal Tessin en direcziun Svizra tudestga. Ad Arth-Goldau possian pendularis e pendularias alura midar en ils trens per Zug e Turitg. Grazia a quest tren èn ils pendularis tessinais la damaun in'ura pli svelts en Svizra tudestga.
Bunamain 50'000 plazzas supplementaras per Pasca
A Pasca laschan las Viafiers federalas cursar 49 trens supplementars cun radund 49'000 plazs da seser supplementars sin l'axa dal Gottard. Questa mesira vala a partir da gievgia sontga fin glindesdi da Pasca. La gronda part dals trens curseschan tras il tunnel da basa dal Gottard.
Cun la midada d'urari il december passà era oriundamain planisà d'introducir il tact da mes'ura tras il tunnel da basa dal Gottard. Pervia d'in accident en il tunnel l'avust passà sa retarda questa novaziun entant.
Lavurs da reparatura sin buna via
Las lavurs da reparatura en il tunnel da basa dal Gottard s'avanzan entant tenor plan. Las Viafiers federalas quintan che las lavurs sajan terminadas il settember da quest onn e ch'ils trens curseschian a partir da lura puspè normal tras il tunnel.
