Siglir tar il cuntegn

Header

audio
Svizra Turissem: Stagiun d'enviern cun sfidas
Or da Actualitad dals 10.11.2021.
laschar ir. Durada: 3 minutas 10 Secundas.
cuntegn

Turissem Optimissem per la stagiun d’enviern

Malgrà che las cifras d'osps na sajan anc betg sa revegnidas vesa Martin Nydegger, il directur da Svizra Turissem, indizis positivs.

Las cifras actualas fan curaschi. Prest 3,3 milliuns pernottaziuns han ils hotels svizzers dumbrà il settember. Bain sajan quai anc adina da quai da 10% sut il nivel dal medem mais dal 2019, pia avant la pandemia. Ma il trend mussia cleramain ensi, di Martin Nydegger, il directur da Svizra Turissem. Entant ch'ils osps da l’exteriur manchian anc adina – qua datti anc adina in minus da passa 40%, hajan passa in quart dapli osps indigens passentà lur vacanzas en l’agen pajais.

Natiralmain ha gidà che bleras Svizras e Svizzers han vulì restar en l’agen pajais. Gidà ha era che nus avain gì in atun fantastic. Nus avain era promovì l’atun en Svizra ed en il pajais vischins.
Autur: Martin Nydegger directur Svizra Turissem
Marin Nydegger, il directur da Svizra turissem
Legenda: Giudair bels dis en la naiv Era quest onn spera Marin Nydegger, il directur da Svizra turissem, ch'ils osps svizzers passentan lur vacanzas d'enviern en Svizra. Keystone

Speranza per stagiun d'enviern

Cun buna speranza guarda el perquai era vers la stagiun d’enviern che stat avant porta. Tradiziunalmain fetschian ils Svizzers ora la mesadad dals osps. Pervia da la pandemia vegn dentant spetgà che quella cumpart vegn era quest enviern ad esser pli gronda. Ils osps dals pajais vischins e da l'Europa sajan dentant vinavant impurtants. Grazia a restricziuns da viagiar main severas en lur pajais hajan per exempel ils turists da la Pologna procurà per in veritabel boom l’enviern passà. Era en il Grischun nua ch'il dumber da pernottaziuns da la Pologna è sa multiplitgà cun trais. E quai pudessi sa repeter quest enviern, manegia Martin Nydegger. 

Anc mai avain nus gì uschè blers access da la Pologna sin nossa pagina internet da. Ma er auters martgads sco la Germania e la Frantscha èn empermettents. E lura datti in’autra nova positiva: Ils Englais pon transfurmar lur certificat da Covid naziunal en in certificat europeic e pon uschia era viagiar en Svizra. Ed enconuschentamain è l’Engalterra fitg impurtanta per nus.
Autur: Martin Nydegger directur Svizra Turissem

Desister ston ils hotels dentant dals osps da la Russia. En tutta cas sch'els èn vaccinads cun il vaccin russ 'sputnik v'. Quel n’è betg sin la glista da la WHO e cun quai na dastgan turistas e turists da la Russia betg viagiar en Svizra.

Bunas notas per il Cussegl federal

Positiv vesa Martin Nydegger il fatg ch'il Cussegl federal n’ha, auter che las regenzas ed autoritads dals pajais vischins, betg introducì la regla da 3G per ils territoris da skis indigens.

Quai è in pragmatissem saun, betg far grev a l’osp la vita. Dentant esser pront sche las infecziuns u las ospitalisaziuns cuntanschan ina grondezza nua che nus na pudain betg pli responsar quellas.
Autur: Martin Nydegger directur Svizra Turissem

Per impedir talas restricziuns saja perquai impurtant che uschè bleras persunas sco pussaivel laschian vaccinar cunter il coronavirus. Quai gidia il turissem svizzer, accentuescha Martin Nydegger.

RTR actualitad 17:00

Artitgels legids il pli savens

Scrollar a sanestra Scrollar a dretga