Uschia inditgeschan 55% dals geniturs dumandads ch'igl hajan dispitas cun ils uffants davart il temp al monitur. Quai saja surtut tar geniturs cun uffants minorens il cas. La mesadad di, ch'igl hajan difficultads da scumandar tschertas plattafurmas u apps. Be tar 13% dals uffants saja «fitg simpel» da regular – 46% din ch'i saja difficil da limitar il temp al monitur dals uffants.
In motiv daco ch'i dat dispitas saja il squitsch social tar uffants. Els veglian esser online per restar en contact cun amis e per betg manchentar insatge. Els na vulan betg sa sentir exclus dad auters uffants.
Maioritad fiss per scumond da handys en scola
La retschertga mussa era che var 81% da la glieud èn da princip per in scumond da handys en scola. Circa medem blera glieud scumandass gugent plattafurmas da social media per uffants sut 16.
In scumond da handys vegn actualmain discutà en differents lieus. Uschia ha per exempel il chantun Sutsilvania decis ina sort scumond da telefonins, tablets e laptops en scolas popularas. En Grischun aveva il Lyceum Alpinum a Zuoz fatg in test da scumandar handys.
Discussiuns pli intensivas datti davart la plattafurma TikTok. Quella app da videos curts stat en la critica da rimnar bleras datas. Plinavant datti critica che quella app promovia dependenzas. En la retschertga da Sotomo èn var la mesadad da las persunas dumandadas per u plitost per in scumond general da TikTok en Svizra. Pli veglias che las persunas èn e plitost ch'ellas sustegnan in scumond. Tar persunas da 18-29 onns èn 43% per u plitost per in scumond.
Blers geniturs han tema per lur uffants
La retschertga da Sotomo mussa che blers han il sentiment dad enconuscher ils ristgs en l'internet. Blers geniturs teman dentant che lur uffants sajan infurmads memia pauc. Quai è er in motiv pertge ch'ils geniturs vulan mesiras da restricziun.
Circa in terz dals geniturs han dentant er il sentiment d'esser sez surdumandads sch'i va per uffants e l'internet. Uschia saja per exempel difficil da declerar e discutar davart ils ristgs da segirezza. La gronda part da las persunas dumandadas (89%) è dentant la l'avis ch'ils geniturs ston giugar la rolla la pli impurtanta. Ma era la scola ed autras instituziuns da furmaziun stoppian infurmar (77%).