«Spargnar aua en l'agricultura!», quai è l'appel dal directur da l’Uffizi federal d’agricultura, Christian Hofer. Las consequenzas dal stgaudament dal clima fetschian quitads. E l'aua na saja betg remplazzabla.
Co spargnar?
I dovria dapli indrizs da sauar intelligents, ha ditg Hofer en l’intervista cun las gasettas da Tamedia. Ed ins stoppia midar pli savens sin culturas d'enviern. Furment d'atun possia per exempel profitar da la plievgia l'enviern.
Management d'aua
Hofer pretenda er ch'i vegnia mess davart dapi aua en reservuars ed in meglier management. Fin uss vegnia il diever d'aua registrà mintgamai dals chantuns e quai en modas differentas. I dovria in management subordinà per evitar conflicts d'interess per l'aua tranter agricultura ed industria.
Fin uss haja la Confederaziun investì mintg’onn tranter dus e trais milliuns francs en indrizs da sauar. L'Uffizi quinta che las expensas per tals indrizs sajan en 10 onns quatter giadas uschè autas. La Confederaziun, chantuns e manaschis surpiglian mintgamai in terz dals custs dals indrizs da sauar.