Siglir tar il cuntegn

Header

cuntegn

Universitad da Turitg Naginas alternativas al certificat en ils auditoris

Per il rectur da l’Universitad da Turitg, Michael Schaepman, na datti naginas alternativas al certificat da Covid-19 en ils auditoris. Quai ha el ditg en in’intervista cun la NZZ. Dentant avess el beneventà ch’ils tests da corona fissan vinavant stads gratuits per persunas betg vaccinadas. Quai enfin che l’obligatori da certificat valia a las scolas autas. L’incumbensa da l’universitad saja numnadamain da scolar persunas che garanteschian la persistenza da la Svizra. L’obligatori da certificat da Covid-19 na dastgia betg sutminar il dretg da furmaziun, ha suttastritgà il rectur da l’universitad da Turitg.

Var 80 fin 90% vaccinads

Tenor Schaepman manca en Svizra ina finamira da vaccinaziun: «Quai è in problem». I dettia bain scenaris da sortida, el craja dentant che blers na pon entschaiver cun quai nagut. Meglier fiss da dir, tar ina quota da vaccinaziun da tant pertschient vulair sortir. Las autoritads duessan communitgar pli avert. Schaepman part dal fatg, che a l'universitad da Turitg tranter 80 e 90% da las studentas e students èn vaccinads. Ins haja fatg ina retschertga cun 2'000 persunas. E la quota da vaccinaziuns creschia anc.

Prolungà per 10 dis

La Confedeaziun vul vinavant retegnair vid ses plans, che betg vaccinads che dovran in certificat, ston pajar sez ils test. El ha uss prolungà il termin: Ils tests da corona restan uschia gratuits per diesch ulteriurs dis. Il Cussegl federal propona era che tests per persunas ch'èn vaccinadas ina giada, restian gratuits fin la fin da november. El è dentant vinavant da l'avis ch'i na saja betg l'incumbensa da la generalitad da pajar tests per persunas che na sa laschan betg vaccinar.

Ord l'archiv

A partir da glindesdi, ils 13 da settember, dovri en l'entira Svizra in certificat per tschertas activitads.

RTR novitads 09:00;

Artitgels legids il pli savens

Scrollar a sanestra Scrollar a dretga