Per Peter Barandun è il sport da skis gia adina stà ina gronda passiun. Fin ch'el aveva 16 onns ha el gì sez il siemi da vegnir skiunz professiunal. Ma quai n'ha betg funcziunà. Suenter ha el surpiglià la responsabladad tar il club da skis Heinzenberg. Peter Barandun è er l'aug da Gianluca Barandun, l'anteriur skiunz ch'è sa disgrazià en l'onn 2018 cun parasgular. Dapi il 2012 è l'um grischun commember dal presidi da Swiss-Ski.
En scola secundara hai jau mess mia tastga da scola sper la pista. Lura hai jau dasper la costa chatschà en las pitgas en la naiv ed hai sulet trenà per il slalom. En mia chombra eran pitgads si posters da mes pli gronds stars. Il fieu per il sport da skis era gia adina en mai.
Sia via professiunala
Il sport da Skis era gia adina sia gronda passiun, ma professiunalmain ha el fatg in pau in’autra via. L’emprim ha el fatg in’emprendissadi sco electricist.
Dapi 23 onns è Peter Barandun il CEO da la firma Electrolux. Quest uffizi vegn el a far enavant en l'avegnir, dentant è el s'organisà per ch'el possia prender avunda temp per sias incumbensas tar Swiss-Ski.
Jau vuless dar dapli fatscha a mes collavuraturs e mias collavuraturas. I na sto betg esser adina il president che stat davant.
El na vegn betg a s'occupar uschè profundamain dad in tema sco Urs Lehmann. La collavuraziun è per Peter Barandun fitg impurtanta, perquai vul il nov president surdar bleras lavurs era a ses team.
Sias visiuns per Swiss-Ski
La finamira da Peter Barandun è da er anc promover las autras 10 disciplinas, sper il ski alpin nua che Swiss-ski è cleramain la pli ferma organisaziun naziunala.