Els quintian che la varianta Delta vegnia ad esser la varianta dominanta en Svizra en quatter enfin sis emnas. Quai ha ditg Urs Karrer, il vicepresident da la task force scientifica da la Confederaziun envers la «NZZ am Sonntag». Perquai vulan las autoritads che dapli glieud sa lascha vaccinar. La vaccinaziun cumplaina che sa basa sin mRNA duai numnadamain gidar en la regla cunter la varianta Delta.
Per cuntanscher la nova finamira da 80% haja num d’animar quels e quellas – che sajan anc indecis u che na sappian betg avunda davart l’avantatg da la vaccinaziun. In’idea è da porscher staziuns mobilas da vaccinar, per exempel en centers da cumpra.
La varianta Delta dal coronavirus è var 50% pli contagiusa, che la varianta ch’è stada enfin ussa dominanta. L’Uniun europeica quinta che Delta è fin la fin d’avust responsabla per 90% da las novas infecziuns en ses pajais.
