Dals vaguns IV posseda la SBB quasi 500 tocs. Tar in da quels avevi dà avant duas emnas in accident mortal. Ussa duain varga 200 da quels vegnir revedids dal tuttafatg. Ils custs totals muntan a 90 milliuns francs. Bunamain la mesadad da quelllas lavurs ha la SBB surdà oz en Germania,, numnadamain 43 vaguns. La raschun saja ch'i manchian capacitads en Svizra, sco la SBB ha communitgà oz.
Davart da la cumissiun da traffic dal Cussegl naziunal hai gì num che manaschis che stettian da manaivel a la Confederaziun hajan in'obligaziun speziala, da cumprar prestaziuns en Svizra e da sustegnair l'industria. Surdadas en l' exteriur stoppian perquai restar l'excepziun.
Tenor la gasetta online «20 minutas» ha il sindicat dal persunal da transport schizunt pretendì novas reglas per talas concurrenzas.
Las controllas extraordinarias dals 496 vaguns dal tip EW IV duran tenor l'SBB sis fin otg emnas. Mintgadi vegnian controllads 10 fin 15 vaguns. Cuntrari a la controllas simplas ch'i dat mintga set fin diesch dis vegnan uss controllads tut ils elements da segirtad da las portas.
RR novitads 17:00
