Siglir tar il cuntegn

Header

cuntegn

Valan mo pli 270 dis A partir dals 31 da schaner scrodan blers certificats da Covid

A partir dals 31 da schaner valan ils certificats da persunas vaccinadas u guaridas mo pli 270 dis. Quai aveva il Cussegl federal decidì avant var duas emnas.

Maletg simbolic.
Legenda: A partir dals 31 da schaner valan ils certificats da persunas vaccinadas u guaridas mo pli 270 dis. Keystone

Tge certificats na valan betg pli? A partir dals 31 da schaner valan ils certificats da persunas vaccinadas e guaridas mo pli 270 dis. Quai vala er retroactiv. Pia: Per persunas ch'han gì la davosa vaccinaziun avant ils 7 da matg 2021, na vala il certificat betg pli. Il medem vala per persunas guaridas, ch'han survegnì il certificat avant ils 7 da matg. Tgi ch'ha survegnì in booster, survegn er in nov certificat che vala puspè 270 dis.

Fin uss valevan ils certificats mintgamai 365 dis, pia in onn.

Daco valan ils certificats mo pli 270 dis? Cun quella decisiun vul il Cussegl federal garantir, ch'il certificat svizzer resta cumpatibel cun ils certificats da l'Uniun europeica. Quai ha el ditg avant duas emnas tar ina conferenza da pressa. En l'Uniun Europeica valan ils certificats da vaccinaziun er 270 dis.

Ils certificats da persunas guaridas valan en l'UE dentant mo 180 dis – en Svizra vinavant 270 dis. Il motiv n'è pia betg mo la tecnica. Commentaturas e commentaturs supponan, ch'il Cussegl federal vul promover cun quai ina terza vaccinaziun. Il booster protegia numnadamain er bain cunter ospitalisaziuns e cunter andaments grevs.

Quantas persunas èn pertutgadas? Tenor in'enquista da SRF scrodan glindesdi var 250'000 certificats. Cun quai ch'ina persuna po dentant avair plirs certificats (per exempel in certificat per guarids e pli tard in certificat per vaccinads) èsi difficil da dir. Fin ils 6 da matg 2021 avevan var 1,14 milliuns persunas survegnì la segunda vaccinaziun. Ina gronda part da quellas persunas hajan dentant er schon survegnì ina dosa da booster.

Ina calculaziun da SRF quinta, che mintg'emna pudessan scrudar tranter 170'000 e 350'000 certificats. Quai èn surtut ils certificats da vaccinaziun dals mais matg fin fanadur. En quels mais era la quota da vaccinar fitg auta.

Co poss jau prolungar mes certificat? Per prolungar il certificat ston ins sa laschar dar ina terza vaccinaziun. En quasi mintga chantun datti la schanza da survegnir a curta vista in termin per quai – u schizunt senza termin. Infurmaziuns datti sin la pagina d'internet dal chantun.

audio
Per tadlar curt e cumpact
ord RTR Audio dals 31.01.2022.
laschar ir. Durada: 1 minuta 4 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga