Nua è la nova varianta vegnida scuvrida? Il november han ins chattà ils emprims cas en la Botsuana ed en l'Africa dal Sid. Spezialmain pertutgadas èn las regiuns da las citads grondas Johannesburg e Pretoria, e la provinza Gauteng.
La Belgia ha registrà il venderdi l'emprim cas confermà en l'Europa da la varianta «B.1.1.529», uss enconuschenta sco «Omicron». Plinavant han l'Israel e Hongkong confermà cas tar persunas ch'èn vegnidas ord l'Africa dal Sid. Tenor il BAG na datti nagins cas cun la nova varianta en Svizra (sonda, 09:00).
Tge è spezial tar quella varianta? La varianta «B.1.1.529» ha in grond dumber da mutaziuns tar il protein spike. Quai è il protein che sa collia cun las cellas dal corp. En tut ha ella 32 mutaziuns, bleras èn gia enconuschentas dad autras variantas. Certas mutaziuns sajan responsablas per ina pli auta abilitad d'infectar, autras possian neutralisar l'immunitad, supponan scienziads.
Pertge san ins, che la nova varianta è pli contagiusa ch'autras? Per l'ina enconuschan ins gia quai dad autras variantas, sco per exempel da la varianta «Delta». Per l'autra sa mussa quai vid l'augment rasant da cas en l'Africa dal Sid.
Tenor il redactur da scienzia dad SRF, Thomas Häusler, stoppian ins dentant esser precaut cun l'interpretaziun da questas datas. Ins n'haja anc betg avunda datas per confermar che l'augment saja propi pervia da questa nova varianta. I possia era esser ch'in pèr events gronds hajan chaschunà l'augment. Era pussaivel saja, che la nova varianta na possia betg sa derasar en pajais ch'han la varianta «Delta». Quai hajan ins gia vis tar autras variantas.
Han las vaccinaziuns actualas effect cunter la nova varianta? Pervi da las mutaziuns da la nova varianta possia esser ch'il schurmetg tras la vaccinaziun pudess esser pli pitschens, di Thomas Häusler. Sche quai saja propi uschia, stoppian dentant experiments mussar. Emprims resultats possia dar en in pèr dis u emnas.
Co reagescha il mund? Blers pajais han gia restrenschì sgols ord l'Africa dal Sid. L'UE vul reducir viadis ord quella regiun sin il absolut minimum.
Tge munta quai per la Svizra? Ins stoppia reagir spert, di Thomas Häusler. Uschia possian ins gudagnar temp e rinforzar l'analisa e surveglianza dal virus. Sche la nova varianta saja propi pli contagiusa, vegnia ella en tutta cas a sa derasar. La Svizra ha scumanda sgols directs ord il sid da l'Africa. Persunas che vegnan ord quella regiun, ord Hongkong, l'Israel u Belgia, ston preschentar in test negativ da Covid-19 ed ir per diesch dis en quarantina.
