Il president da la Confederaziun Ignazio Cassis è s'inscuntrà cun il president ucranais Wolodimir Selenski a Kiev. El haja segirà a l'Ucraina il sustegn da la Svizra, ha scrit Cassis via Twitter. Plinavant hajan els discutà ils basegns umanitars e l'agid da la Svizra.
Cassis surprendentamain a Kiev
Il viadi dad Ignazio Cassis en l'Ucraina è stà ina surpraisa. El veglia sa far in agen purtret da la situaziun da guerra, la situaziun umanitara e las lavurs preparativas per la reconstrucziun dal pajais, ha argumentà il cusseglier federal.
La notg da mesemna sin gievgia è el viagià cun il tren da la Pologna en l'Ucraina, hai gì num en in rapport da medias. Sin Twitter è Cassis s'exprimì oz:
Il president da la Confederaziun ha organisà il fanadur a Lugano ina conferenza per la reconstrucziun da l'Ucraina. Er il settember ha Cassis accentuà che la Svizra saja abla da far punts. Ils criteris elavurads a la conferenza da Lugano valan sco criteris acceptads per la reconstrucziun e la refurma da l'Ucraina. Proxima emna va Cassis a Berlin per far part ad ina conferenza per la reconstrucziun.
Quitads per la segirezza
La Russia ha attatgà ils ultims dis la chapitala da l'Ucraina cun dronas. Il president da la Republica federala Tudestga ha perquai spustà ses viadi planisà a Kiev. Raschun eran quitads per la segirezza. L'uffizi presidial ha confermà quai a la gasetta «Bild». L'uffizi per l'exteriur ed il ministeri per l'intern hajan scusseglià da far il viadi perquai ch'i saja memia malsegir. La visita duai dentant vegnir spustada.
