En il 2022 èn mintga di viagiadas 1,16 milliuns persunas cun trens da las Viafiers federalas svizras, quai sajan 30,8% dapli che l'onn passà, scrivan l'interpresa. Quai èn dentant anc adina 12,5% damain che l'onn 2019 avant la pandemia.
Perdita da 245 milliuns
Malgrà dapli venditas da bigliets e resultats positivs cun immobiglias, ha la viafier fatg ina perdita da 245 milliuns francs. Quai surtut pervi da perditas tar l'infrastructura d'energia (-185 milliuns francs) ed ina rectificaziun da la valur tar la SBB Cargo (-83 milliuns francs). Ils debits èn creschids per 2,5% sin 11 milliardas francs. La situaziun finanziala restia tendida, uschia la SBB.
Fin il 2030 vul la viafier perquai implementar mesiras d'effizienza e spargnar custs en la dimensiun da 6 milliardas francs.
Giasts e lavurants cuntents ma problems da segirezza
En general saja la fidadadad da la flotta s'augmentada, er la punctualitad saja buna. En la Svizra dal Vest, il Tessin e tar trens da lunga distanza na saja quella dentant betg cuntentaivla. La cuntentezza dals viagiaturs ed da las viagiaturas saja auta, er sch'ella saja sa reducida pervi da trens plains. Er ils collavuraturs e las collavuraturas sajan cuntentas. Tar ina retschertga interna saja la motivaziun dal persunal stada tar 78 da 100 puncts.
Tar la segirtad a la plazza da lavur datti dentant problems. Il dumber d'accidents da lavur e da tren è creschì l'onn passà. En il 2022 hai dà tschintg accidents da lavur mortals.
