Tar las Viafiers federalas è il squitsch da spargnar grond. La SBB ha mumentan debits dad 11 milliardas francs. Uss vul il concern ir vi da las pajais e las prestaziuns da l'assicuranza sociala che fan ora 44% dals custs. Latiers duain las deducziuns tar las pajas dal persunal vegnir augmentadas. La SBB desistia però da reducziuns da paja sco talas, u da stritgar plazzas. Per ils sindicats n'èn questas propostas da spargnar dentant betg acceptablas. La SBB sbassia uschia la forza da cumpra da l'entir persunal, e reduceschia la protecziun da quellas e quels sur 50.
Spargnar milliardas sco finamira
La situaziun finanziala da la SBB è tendida. L'interpresa vul spargnar ord atgna forza radund 11 milliardas francs per segirar la finanziaziun fin l'onn 2030. Vitiers spetga la Confederaziun a partir da l'onn 2024 ulteriurs respargns da radund 80 milliuns francs ad onn entras pli bas custs u entradas pli autas.
