Tensiuns che creschian tranter las pussanzas grondas, conflicts armads, la smanatscha da terror, che las organisaziuns internaziunalas vegnian pli flaivlas, attatgas da cyber e sco ultim la pandemia da Covid-19. Tut quai haja fatg cler che la situaziun stabila e ruassaivla possia sa midar fitg svelt en il cuntrari.
Perquai ch'ins na possia betg vesair ordavant talas smanatschas, stoppia la Svizra garantir la segirezza uschia ch'i lubeschia da prender las mesiras necessarias. Vitiers tutgia er la protecziun encunter attatgas or da l'aria, ha ditg Amherd.
Flotta memia veglia
Per garantir la segirezza er en avegnir, stoppian ils aviuns da cumbat dad oz vegnir remplazzads. Ils aviuns da F-5 èn dapi 40 onns en funcziun e pon sgular be da bell'aura. Las F/A-18 pon be anc sgular fin maximal il 2030.
Noss aviuns èn tecnicamain antiquads ed han cuntanschì lur vegliadetgna maximala
Tge aviun da cumbat che duai remplazzar ils vegls, n'è anc betg cer. Il Cusegl federal decida quai l'entschatta 2021. Il settember vegn be vuschà davart il principi sch'ins vul cumprar novs aviuns, sco era davart ils custs maximals da 6 milliardas francs. Plinavant vul la planisaziun che almain 60% da quels custs vegnan cumpensads tar interpresas svizras.
Naginas alternativas
Sch'il suveran di gea a questa fatschenta d'armament, duain ils emprims novs aviuns esser pront il 2025. A fin duai l'acquisiziun lura esser il 2030. Quai saja cumplex, perquai stoppian ins uss cumenzar cun ill remplazzament dals aviuns.
Il Cussegl federal aveva examinà pliras alternativas. Er la cumpra d'aviuns pli levs. Quels custassan pli pauc. Tals aviuns na sajan dentant betg adattads per il servetsch da polizia d'aria perquai ch'els na possian betg sgular aut avunda. Er ils radars e l'armament na saja betg adattà. Il medem valia per dronas ed helicopters.
Er in'allianza cun ils pajais vischins na possia tenor Amherd, betg garantir la segirezza da la Svizra. Quai per raschuns da la politica neutrala. Plinavant saja quai ina dumonda da la solidaritat che la Svizra protegia sezza ses spazi d'aria, ha ditg Amherd.
«Fa senn ed è necessaria»
Ils novs aviuns da protecziun duain rugalar ils medems pensums sco la flotta da F/A-18. Il servetsch da polizia d'aria, la protecziun da conferenzas internaziunalas, la controlla dal spazi d'aria tar conflicts enturn la Svizra sco era la defensiun en cas d'inattatga or da l'aria.
Jau sun persvasa che l'investiziun en la segirezza da noss pajais fa senn ed è necessaria.