Las staziuns intensivas en Svizra tgiran adina dapli pazients da Covid-19. La situaziun en ils ospitals restia tendida, ha ditg Virginie Masserey da l'Uffizi federal da sanadad BAG, avant las medias a Berna.
La situaziun actuala saja intscherta cun radund 3'000 novs cas a di. Quai saja relativamain aut, cumpareglià cun la segunda unda. La media chantunala da Berna, Linda Nartey, ha ditg ch'i saja cunzunt d'observar bain las capacitads libras dals ospitals. Quels na possian betg avrir a la sperta ulteriurs letgs intensivs damai ch'il persunal scolà manchia.
Mesadad da las persunas en ospital sut 53 onns
Vaccinadas cumplainamain èn entant 52% da las persunas, 57% han survegnì almain ina dosa dal vaccin. Tar ils creschids sajan quai 62%, tar giuvenilas e giuvenils sajan radund 18% vaccinads cumplainamain.
Masserey fa attent che la probabilitad da sa tschentar en ospital è pli gronda sch'ins n'è betg vaccinà ed er ch'i pudess dar in decurs grev da la malsogna. La mesadad da tut ils pazients da Covid-19 che n'èn betg vaccinads, èn sut 53 onns. Quels giaschian pli ditg sin la staziun intensiva. «Ins sto sa laschar vaccinar era sch'ins è pli giuven», uschia possian ins distgargiar ils ospitals.
Atun ed enviern avant porta
Masserey ha er menziunà che la probabilitad da s'infectar è radud 70% fin 90% pli bassa per persunas vaccinadas. Er da dar vinavant il virus è pli pauc probabel. «Geniturs dattan vinavant pli pauc savens il virus als uffants. Perquai saja uschè impurtant da sa laschar vaccinar ussa. La protecziun gidia gea pir en radund sis emnas e l'atun e l'enviern stettian davant pporta.
Ils avantatgs d'ina vaccinaziun predomineschian cleramain, er per la psica. Contacts restian pussaivels. Effects secundars dettia pli pauc savens che tar piztgadas d'insects. Inflammaziuns dal cor possia bain dar, ma sajan fitg stgarsas cun in fin dus cas sin 100'000 persunas. Plinavant possia dar talas inflammaziuns er suenter in'infecziun cun il coronavirus sez.
