Mardi duain vegnir vaccinadas las emprimas persunas cunter la virola da schimgias a Turitg ed a Genevra. En ils chantuns Vad e Basilea-Citad duai la vaccinaziun anc cumenzar en las proximas emnas. L'apoteca da l'armada haja scumpartì 4'000 dosas. Dapli dosas suondan lura fin la fin da l'onn. Sco che l'Uffizi federal da sanadad (BAG) ha communitgà en october, ha la Confederaziun ordinà 40'000 dosas da vaccinaziun da la firma Bavarian Nordic. La Svizra è pli plauna cun vaccinar che ils stadis da l'Uniun europeica.
Persunas periclitadas duain vegnir vaccinadas
Igl è pussaivel da s'annunziar per la vaccinaziun, il dumber da vaccinaziuns è dentant limità. La vaccinaziun vegn cussegliada ad umens che han sex cun umens u persunas trans cun differents partenaris u partenarias sexualas. Er a persunas che pudessan vegnir en contact cun il virus en lur plazza da lavur, vegn cussegliada la vaccinaziun.
Persunas ch'èn vaccinadas cunter la virola umana u che han gì la virola da schimgias na dovrian betg la nova vaccinaziun, scrivan il chantuns.
