Pervi dals emprims cas dad infecziuns en l'Italia dal Nord fa ils Tessin ussa quitads ch'il virus da Corona pudess sa derasar en il chantun. L’entir affar saja pli grond che quai ch’ins haja supponì l’entschatta, ha ditg il medi chantunal dal Tessin, Giorgio Merlani, envers Keystone-SDA.
Ospitals e staziuns d’urgenza han prendì emprimas mesiras. Persunas cun sintoms da grippa vegnan isolads, rapporta la gasetta «Il caffè della domenica». Quai val per tut las persunas cun sintoms da grippa e betg sco fin ussa, be persunas che han il davos temp visità la China.
Nagina nova strategia en Svizra
Er sche l'Italia ha actualmain ils pli blers cas dad infecziuns en l'Europa ed ha annunzià sonda dus mortoris, na planisescha l'Uffizi federal per sanadad betg ina midada da strategia. I fissi fauss da suspectar en general tut las persunas da l'Italia. I saja anc memia baud da crair ch'ina unda sa movia uss vers la Svizra.
Bloccà pliras citads en l'Italia dal Nord
L'Italia sezza prenda mesiras rigurusas. La regenza ha decidì da barricadar pliras citads en il Nord dal pajais. Uschia èn facticamain pliras 10'000 persunas bloccadas en lur regiuns.
Entrar ed extrar da quests territoris è scumandà.
La finamira saja, da proteger la sanadad da la populaziun da l'Italia. Sco emprim vegnan quests territoris bloccads. Tgi ch'emprovia da guntgir las barricadas, stoppia quintar cun sancziuns penalas. El quintia dentant cun l'enclegientscha da la populaziun.
Sco ulteriura mesira èn tut las partidas da ballape dad oz dumengia en la Lombardia e Venezia vegnidas ditgas giu, er quellas en la seria A.
Virus ha influenza sin mintgadi en l'Iran
Er en l'Iran ha il virus da Corona restrenschì considerablamain la vita publica. Tenor il ministeri da sanadad èn per entant scolas ed universitads vegnidas serradas en pliras citads. Er kinos e teaters èn vegnids serrads e concerts ditgs giu. Ils gieus da ballape da la liga auta vegnan bain giugads, dentant senza aspectaturs.
Fin uss hai dà 785 cas da suspect, 28 èn vegnids confermads positiv sin covid-19. Fin uss èn morts 5 pazients vid la malsogna. Novs cas d'infecziun n'èn la fin d'emna betg vegnids annunziads.
RTR novitads 06:00
