En l'Italia è in segund pazient mort pervi dal virus da Corona. Quai rapporta l'agentura da novitads Ansa. L'emprima unfrenda mortala en l'Italia è stà in um da 78 onns ch'è mort en in ospital a Padua. Er il dumber da las persunas infectadas saja s'augmentà en noss pajais vischin entaifer paucas uras sin 18. Pertutgads èn era 5 emploiads da l'ospital da Codogno ch'èn vegnids infectads cura ch'ins n'enconuscheva anc betg il motiv da la malsogna. L'um da 38 onns che ha, senza savair, derasà il virus è en in stadi da sanadad critic sin l'intensiva da l'ospital.
Tut sut controlla
Il schef da la regenza taliana, Giuseppe Conte ha plinavant declerà che passa 200 persunas che sajan vegnidas en contact cun infectads sa chattian en quarantina. A medem temp ha el avertì d'alarmissem, dentant confermà che tut saja sut controlla.
Mesiras da prevenziun
L'Italia è plain quitads pervia d'ina derasaziun dal virus da Corona. Las autoritads han ordinà venderdi en 10 citads en il nord da l'Italia che las scolas, uffizis ed ulteriurs bajetgs publics vegnan immediat serrads. Dentant era fatschentas da victualias, bars, discotecas e center da sport duain vegnir serrads durant in'emna.
Nagins viadis en China – tuttina s'infectads
L’Organisaziun mundiala da la sanadad WHO fa quitads pervi dal virus da Corona. La raschun: Adina dapli persunas s’infecteschan cun il virus che n’han betg fatg viadis e n’han nagina colliaziun cun la China.
Wuhan – navs da cruschera per persunal medicinal
Per dar dumogn al virus da Corona ha la regenza chinaisa tramess dapli persunal medicinal en la citad Wuhan. Per metter sut tetg ils medis, assistents e tgirunzs han ins transportà set navs da cruschera en la citad. Uschia stettian a disposiziun 1’500 letgs per il persunal medicinal. Quai rapportan las medias statalas chinaisas.
Il virus da corona preoccupa – ils trais scenaris
Igl è anc avert, co il virus da Corona vegn a sa cumportar en avegnir. Tenor Katrin Zöfel, redactura da scienza da SRF, datti trais scenaris:
RTR novitads 06:00
