La decisiun tge genitur che reducescha ses pensum da lavur e quant, suenter la naschientscha da l’emprim uffant – haja consequenzas a pli lunga vista. Quai constatescha in rapport da la Confederaziun. Savens na midia la situaziun lura betg pli. Plinavant gioghia il gudogn da la mamma ina rolla impurtanta. Pli pitschen che quel saja, e pli savens che las famiglias vegnian a finir en ina situaziun finanziala precara.
Tenor il rapport federal datti era differenzas regiunalas. Geniturs da la Svizra tudestga reduceschan lur pensums dapli, che geniturs en autras regiuns da la Svizra.
