La situaziun da las famiglias sch'i va per cumbinar la lavur e la tgira dals uffants en il Grischun duai vegnir meglierada. La tgira cumplementara saja centrala per questa finamira, scriva la regenza grischuna en ina communicaziun. Quella gidia da cumbinar la lavur e la famiglia e plinavant er da promover il svilup e l'integraziun sociala dals uffants.
Daners directs per familgias
Per meglierar la tgira cumplementara vul la regenza ussa reveder la Lescha davart la promoziun da la tgira d'uffants cumplementara a la famiglia en il chantun Grischun (LTGU). Da nov duain il chantun e las e vischnancas sustegnair directamain famiglias tenor lur situaziun economica. Fin ussa pajava il chantun contribuziuns a canortas e sumegliantas instituziuns da tgira d'uffants. Quellas avevan d'adattar lur tariffas a l'entrada da las famiglias. La nova lescha minimeschia il ristg per canortas e purschidas da la tgira d'uffants en territoris cun structuras deblas u cun blers geniturs cun entradas bassas tenor la regenza. En pli duai il chantun survegnir dapli meds tras la nova lescha per la tgira cumplementara d'uffants cun impediments.
Custs betg clers
La nova lescha diminueschia ils custs per las famiglias e chaschunia dapli custs per il chantun e per las vischnancas. Ils custs precis sajan dinamics e dependian dal basegn da tgira e da la capacitad economica da la famiglia. Il chantun spetga però ch'ils custs cunvegnian a lunga vista grazia a l'effect positiv sin l'economia publica.
Adattà al tema
