Siglir tar il cuntegn

Header

cuntegn

Votaziuns 17-05-2020 PPS: GEA per limitaziun – GEA cunter lufs

365 delegadas e delegads da la Partida populara svizra PPS èn sa radunadas e radunads la sonda a Seedorf (UR). Là han ellas ed els sa fatschentà cun las parolas per las votaziuns dals 17 da mai. Quai scriva l'agentura da novitads svizra SDA.

Cler GEA a l'iniziativa da limitaziun

Il matg voteschan las Svizras ed ils Svizzers da l'iniziativa da limitaziun da la PPS. La posiziun da la partida è clera: Las delegiadas ed ils delegiads recumandian in cler GEA, rapporta l'agentura da novitads svizra SDA.

Albert Rösti, il president da la PPS, ha appellà a sia partida da s'engaschar en il cumbat da votaziun per sia iniziativa da limitaziun:

Nus na vulain nagina Svizra da 10 milliuns.
Autur: Albert Rösti president PPS

La cunvegna davart la libra circulaziun da persunas cun l'Uniun europeica UE haja da vegnir eliminada, perquai ch'ina immigraziun illimitada fetschia donn a l'economia e la natira e laschessi vegnir stgarsas las abitaziuns.

La PPS pretenda da tractar cun l'UE davart la circulaziun libra ed a cas er da disdir la cunvegna. Int tal pass mettess en privel tut ils contracts bilaterals I, scriva la SDA.

Cler GEA per sloccar la protecziun dals lufs

Cun 356:8 vuschs è la PPS er sa decidida per sajettar pli facilmain lufs en Svizra. Quai è ina da las midadas che la lescha da chatscha e protecziun revidida prevesa. Uschia possian vegnir sajettads lufs per regular lur populaziun – senza ch'ins haja prendì avant mesiras da protecziun cunter els.

Cunter la lescha revidida da chatscha avevan differentas organisaziuns per la protecziun da l'ambient prendì il referendum.

Las votaziuns dals 17 da mai 2020

Avrir la box Serrar la box

Il suveran svizzer ha da votar la primavaira segiramain da duas fatschentas da votaziun naziunalas:

  • L'iniziativa da limitaziun da la PPS – quella ha en mira da pudair visar la libra circulaziun da persunas cun l'UE.
  • La lescha da chatscha – quella preveda tranter auter da schluccar la protecziun dal luf.

Prevesida è er ina votaziun davart la taglia federala directa – punct central en questa lescha è d'augmentar las deducziuns per la tgira d'uffants externa. Cun quai che la PS ha annunzià in referendum n'èsi anc betg cler, sch'er questa votaziun vegn ad avair lieu la primavaira.

RTR novitads 16:00

Artitgels legids il pli savens