Parolas dals Verds
I saja da chalar cun il commerzi malnet da materias primas. La Svizra stoppia reponderar sia politica d'energia e da materia prima. Mo cun duvrar damain energia e stgaffir energia regenerabla possian ins reducir la dependenza e terminar la finanziaziun da guerras autocratas. Quai pretendan ils Verds en ina resoluziun.
A la radunanza da delegadas e delegads a Zug han els plinavant decis las parolas per las votaziuns dals 25 da settember. A la refurma da l'AVS ed a l'aboliziun parziala da la taglia anticipada din els Na. In Gea recumondan ils Verds a l'iniziativa cunter l'allevament intensiv.
Parolas da la PPS
La PPS Svizra sustegn la revisiun da l'AVS sco quai ch'ella va en votaziun ils 25 da settember. A Baar han ils delegads e las delegadas decis da sustegnair l'idea d'auzar la vegliadetgna da pensiun e la taglia sin la plivalur. Era Gea ha decis la PPS en connex cun abolir parzialmain la taglia anticipada. Quai aveva gia decis la suprastanza avant la radunanza. Na han ils delegads e las delegadas da la PPS percunter decis en connex cun l'iniziativa cunter allevament intensiv.
Parolas dals verd-liberals
La Partida verd-liberala da la Svizra din duas giadas Gea a la refurma da l'AVS e per abolir parzialmain la taglia anticipada. Cun la refurma daventia il provediment da vegliadetgna pli persistent, ha communitgà la Partida verd-liberala. D'abolir parzialmain la taglia anticipada saja d'avantatg per la confederaziun, ils chantuns e las vischnancas. Quai augmentia la valur agiuntada. Gea di la Partida verd-liberala ultra da quai a l'iniziativa cunter l'allevament intensiv.
Il pievel svizzer decida ils 25 da settember a l'urna davart las quatter votaziuns federalas.
Sin in clic tut davart las votaziuns dals 25 da settember.
