49% da las votantas e dals votants avessan ils 14 da favrer ditg Gea a l'iniziativa che vul in scumond da cuvrir la fatscha, 47% avessan votà cunter l'iniziativa. Ils adversaris han uschia gudagnà terren, quai che chaschuna ina situaziun da pat. L'emprima retschertga da votaziun aveva anc mussà in resultat pli cler a favur da l'iniziativa, il schaner avessan 56% ditg Gea u plitost Gea al scumond.
Uschia ch'i dettia uss in trend en direcziun d'in Na, constatescha gfs.berna. La furmaziun da l'opiniun saja avanzada, 74% da las votantas e dals votants hajan in'opiniun manifestada per ubain cunter l'iniziativa. 4% èn anc indecis.
Differenzas regiunalas
Midadas d'opiniun pon ins constatar en las regiuns. Uschia sa mussia en la Svizra franzosa in cler trend cunter l'iniziativa (46% Gea u plitost Gea). En la Svizra taliana datti il pli grond sustegn (64% Gea u plitost Gea) per il scumond da cuvrir la fatscha. En la Svizra tudestga è il sustegn be anc fitg stretgs (50% Gea u plitost Gea). Sa midadas èn las maioritads er en regiuns urbanas. Votantas e votants ord grondas aglomeraziuns èn per gronda part cunter l'iniziativa. En regiuns champestras ed aglomeraziuns pli pitschnas datti anc ina maioritad che sustegna il scumond.
La lescha davart l'e-ID ha strusch schanzas
Ils 7 da mars decidan Svizras e Svizzers er davart la lescha d'identificaziun electronica, perquai ch'i ha dà in referendum. Ina maioritad da 54% avess votà ils 14 da favrer cunter ubain plitost cunter la e-ID. Ils aderents vegnan actualmain sin 42%. Il trend mussia en direcziun d'in Na, constatescha gfs.berna trais emnas avant la dumengia da votaziuns.
Anc tut pussaivel tar la cunvegna cun l'Indonesia
Mez favrer avess la cunvegna cun l'Indonesia survegnì ina stretga maioritad. 52% da las votantas e dals votants avessan ditg Gea a la cunvegna economica tranter ils stadis da l'EFTA e l'Indonesia – 41% avessan ditg Na. Cumpareglià cun las autras duas fatschentas è la furmaziun da l'opiniun tar la cunvegna cun l'Indonesia plitost malmadira. 7% da las votantas e dals votants èn anc indecis, be 51% han in'opiniun clera per ubain cunter la cunvegna. Quai muntia ch'i pudess dar pli gronds spustaments, scriva gfs.berna.
